И мукьвара Москвадин Миллетрин кIвале урус чIалалди кхьизвай лезги гьикаятчи, РФ-дин писателрин Союздин член, жуьреба-жуьре премийрин, “Московиядин къизилдин къелем” тIварцIин сагьиб Теяра Велиметовадин яратмишунриз талукь мярекат кьиле фена.

Т.Велиметовади вичин “Долгая любовь моя…”, “Узники Азазеля” ва “Чахъ са Чил я авайди” тIварар алай ктабрикай куьрелди ихтилатна. Сад лагьай ктаб ХХ асирдин машгьур манидар Муслим Магомаеваз бахшнавай роман я. (Ктабдиз ихьтин тIвар манидардин уьмуьрдин юлдашди гана). Тажуб жедай кар туш, мярекатдал М.Магомаеван хейлин маниярни тамамарна.

“Узники Азазеля” роман Рос­сиядин Игит Зейнудин Батмановаз бахшнава.

Адан яратмишунрикай мярекатдин мугьманрини — урус словесностдин международный академиядин президент, философиядин илимрин доктор Григорий Осипова, Ломоносован тIвар­цIихъ галай МГУ-дин профессор, “Москвадин лезгияр” НКА-дин регьбер Мадрудин Мегьамед-Эминова, Москвадин областдин Ленинан округдин дишегьлийрин Союздин председатель Елена Ястребовади — итижлу ихтилатар авуна, автордиз эде­биятдин алемда мадни еке агалкьунар хьун алхишна.

ТIебиатдикай аялар патал кхьенвай “Чахъ са Чил я авайди” ктабдикай кьилди Ю.Морозовади ихтилатна. И ктабдай автор­див Г.Осипова В.Вернадскийдин тIварцIихъ галай международный экологиядинни эдебиятдин премиядин лауреатвилин дипломни вахкана.

Яратмишунин мярекат тешкилунай урус словесностдин международный академиядин патай дипломар карчи Сабит Нуралиевав, «Чахъ са Чил я авайди» ктаб акъудуниз куьмек гунай Самид Нуралиевав вахкана.

Татьяна  Соловьева,

РФ-дин журналистрин

Союздин член