Тахсиркарвилерин шегьерар
Хатасузвилин системадин Дельта тешкилатдин пешекарри пиян хьунин нетижада арадал къвезвай тахсиркарвилер гзаф хьанвай Россиядин шегьерар малумарнава. Абурун ахтармишунрин нетижаяр “Новости” РИА-ди раижна.
КIвалахдай вахтунда пешекарри 2019-2021-йисарин муддатда хьайи гзафни-гзаф къалабулух кутур дуьшуьшриз къимет гана. Къейдзавайвал, пиян гьалда аваз инсанри рехъ ганвай тахсиркарвилер виридалайни гзаф Санкт-Петербургда жезва. Кьвед лагьай чкадал Москва ва Челябинск, абурун гуьгъуьнал Самара, Нижний Новгород ва Казань ала.
Ички себеб тир тахсиркарвилер виридалайни тIимил Смоленскда, Уфада, Калугада, Тамбовда ва Курганда хьанва.
Есиррихъ галаз хва дегишариз кIанзава
Эрменистандин премьер-министрдин везифаяр тамамарзавай Н.Пашиняна Азербайжандин президент И.Алиеваз есирвиле амай вири эрменияр ахъай хъувун патал абурун эвезда вичин хва теклифна. “Лента.ру” чешмеди раижзавайвал, идан гьакъиндай “Sputnik Армения” изданида кхьенва.
Ихьтин теклиф Пашиняна вичин оппонентрин — виликдай республикадин президентар хьайи С.Саргсянан ва Р.Кочарянан — туьгьметриз жаваб яз малумарна.
“Алиеваз официальнидаказ лугьузва: есирда авай вири эрменияр азад хъувун патал абурун эвезда за жуван хва теклифзава… Сержик ва Робик, инсанар маса гунин-къачунин пешекарар тирвиляй и месэладин патахъай за квез рахунар кьиле тухудай ихтиярар гузва”, — лагьана Пашиняна.
Малум тирвал, нубатдинбур тушир парламентдин сечкияр Эрменистанда 20-июндиз кьиле фида. Сечкияр кьиле тухунихъ галаз алакъалу яз, Пашинян премьер-министрвилин къуллугъдилай элячIна, амма “Зи кам” партиядай сечкийра гъалиб хьайитIа, вичи а къуллугъдал кIвалахун мадни давамарда лагьана, хиве кьуна.
Дуствилин теклиф
США-дин виликан (40 лагьай) президент Р.Рейганан куьмекчи Д.Бэндоуди исятда уьлкведин регьбер тир Ж.Байденаз Россиядин Президент В.Путинахъ галаз алакъаяр хъсанарун теклифна. Ихьтин фикир Бэндоуди “The American Spectator” чешме патал кхьей вичин макъалада къалурнава.
Адан фикирдалди, Байдена Россиядихъ галаз алакъаяр пайгардик кутун гзаф важиблу я. Сиясатчидин гафаралди, кьве уьлкведин арада алакъаяр зайиф хьунай жавабдарвал анжах Вашингтондин хиве гьатзава: эгер Россиядиз акси яз гзаф кьадарда санкцияр малумарначиртIа, Москвади “Америкадин итижриз къурху” гудачир.
Къейд ийин, Россиядинни США-дин регьберрин гуьруьш 16-июндиз Женевада кьиле фидайвал я.
Телефонрай гьялиз жедач
США-динни Украинадин президентри, телефондай рахуналди, «глобальный тIал алай месэлаяр», гьа жергедай яз Россиядинни Украинадин часпардихъ галаз алакъалу гьаларни веревирдна. Идакай “Лента.ру” чешмеди хабар гузва.
Россиядинни Америкадин саммит кьиле фидалди вилик Байденаз Зеленскийдихъ галаз гуьруьшмиш жез кIанзавайдакай идалай виликни бязи чешмейри раижнай. Телефондай рахай вахтунда Байдена алай йисан июлдиз Зеленскийдиз Лацу кIвализ атун теклифна. Адан фикирдалди, “телефондай рахуналди гьялиз тежедай” месэлаярни ава. Ихьтин малумат сиясатчиди Twitter-да авай вичин аккаунтда чапна.
250 миллиард доллар харжда
США-дин сенатди технический рекьяй Китайдин хура акъвазун патал 250 миллиард доллар чара авуниз талукь законопроект тестикьарна, раижзава “Associated Press” чешмеди.
Къанун кьабулуниз 68 конгрессменди разивална, 32 касди сес ганач. Документдал асаслу яз, Вашингтонди 190 миллиард доллар технология мягькемаруниз ва ахтармишунар кьиле тухуниз, 50 миллиард доллар чипар ва телекоммуникациядин тадаракар арадал гъуниз серфда.
Идалай вилик Америкадин администрацияди гуя Китайдин адалатсуз алишверишдин крариз аксивал къалурун патал цIийи серенжемар кьабулдайдакай малумарнай. Китайдихъ галаз алишверишдин дяведик США-дин виликан президент Д.Трампа кьил кутунай.
Гьужумдин вилик пад кьуна
Сириядин ПВО-дин къуватри Израилдин ракетайрин ягъунар алудна. Къейдзавайвал, ракетайрин вилик пад Ливандин мулкарин кьилел кьуна. Идакай Сириядин SANA агентстводин Twitter-да кхьенва.
Са бязи делилралди, душмандин ракетайрин вилик пад кьун патал ахъайзавай гьар са ракета уьлкведин бюджетдиз 66 агъзур евродай акъваззава. Гьавиляй аскерри анжах халкьар яшамиш жезвай чкайриз зарар гун мумкин тир ракетаяр язава.
«Лезги газет»
