Къе лугьуз жеда хьи, сентябрдин варз политикадин жигьетдай чи республика патал кьетIенди ва важиблуди хьана. РД-дин Халкьдин Собранидин депутатри Дагъустан Республикадин Кьилин къуллагъдал Владимир Васильев хкяна.
9-сентябрдиз Дербент, Избербаш, Къизилюрт, Хасавюрт шегьерра ва Ботлих, Гергебил, Гуниб, Докъузпара, Къарабудахкент, Къизилюрт, Леваша, Новолак районрани Бежтадин участокда сечкияр тешкиллудаказ кьиле фена. Анра шегьеррин, районрин собранийриз депутатар (санлай 290 кас) ва пуд хуьруьн администрацийрин кьилер хкяна.
Къейд авун лазим я хьи, “Сад тир Россия” партиядин Дагъустандин отделение политикадин и важиблу месэладив жавабдарвилелди эгечIна. Отделенидин политсоветдин президиумдин заседанидал рахадайла, отделенидин секретарь Х.Шихсаидова вичин юлдашриз шегьеррин ва районрин собранийриз хкягъун патал жегьилрин, дишегьлийрин арадай бажарагълубур, алакьунар авайбур теклифун меслятнай. Чкадин векилри и меслятдал амална ва депутатарвиле хкянавайбурун арада хейлин жегьилар ва дишегьлияр ава.
Къадим Дербентда сечкияр пара тешкиллудаказ ва секин гьалара кьиле фена. Шегьердин сечкидин территориальный комиссиядин председатель Гьамидин Гьажиагьмедова къейд авурвал, сечкидин 37 участокдин сиягьра 69370 сечкичи авай. Абуру шегьердин собранидиз 35 депутат хкягъун лазим тир. Нетижаяр ихьтинбур хьана: “Сад тир Россиядин” векилри — 69,99 процент, “Гьахълу Россияди” -11,71, “Россиядин ватанпересри” — 10,22 ва КПРФ-ди 6,50 процент сесер къазанмишна.
Избербаш шегьерда сечкидин 16 участокда кьиле фейи сечкийра винидихъ тIварар кьунвай партийрилай алава яз “Родина” ва “Партия Роста” партийрин отделенийрин векилрини чкадин собранида чкаяр кьун патал иштиракна. Ина КПРФ-дин векилар сад лагьай чкадал акъатна — 42,69 процент, “Сад тир Россия” — 31,39 ва “Гьахълу Россия” — 5,03 процент.
Докъузпара районда сечкийрин юкъуз Къаракуьре ва ЦIийи Къаракуьре хуьрерин собранийриз депутатар хкяна. Къаракуьреда депутавиле кандидатар яз къалурнавай 14 касдикай 7 — “Сад тир Россия” партиядин, ирид КПРФ-дин векилар тир.
Дагъустан Республикадин сечкидин комиссиядин председатель Мегьамед Дибирова малумарайвал, республикадин шегьерра ва районра ачухай сечкидин вири участокра кIвалах пайгардик кваз кьиле фена. Законсуз са дуьшуьшдизни рехъ ганач. Партийрин векилрин патай арзаяр авурбурни малум туш.
Санлай къачурла, сечкийра “Сад тир Россия” партиядин векилриз гзаф сесер гана — 56 процент. Адалай гуьгъуьна КПРФ ава — 8,87, ахпа “Гьахълу Россия” — 8,51 ва “Партия Роста” — 4,94 процент.
Шегьеррин, районрин, хуьрерин собранийриз депутатар хкяна, гила абуру республика ва чи гзаф миллетрикай ибарат халкь патал намуслувилелди зегьметни чIугуна кIанда.
Хийир Эмиров
