Им мукьвара хьайи кар я. Азербайжандин банкарикай санай са миллион манат пул гваз экъечIай Иркутск шегьердин агьалидивай, вичин улакьда ацукьдайла, хабарни авачиз пул авай пакет аватна. Къаншарда майваяр маса гузвай чкадин агьали Шамхал Гезалов и кардин шагьид хьана. Масабурун гъиле гьатдалди ам, пул авай пакет вахчуна, вичин улакьда аваз «хазинадин» иесидин суракьда гьатна.

— Адан улакьдин марка зи рикIел аламай, — лугьузва Шамхала. — Гьавиляй за адав фад агакьар хъувуна. Фарайрин эквер ягъуналди, за адавай улакь акъвазарун тIалабна. Амма ада зи ишарайриз са ябни гузвачир. Зун адалай элягъиз алахъайла, ада вичин улакьдин йигинвал генани артухарзавай. Аквар гьаларай, адаз зун пул къакъудун па­тал ви­чин гуьгъуьна гьатнавайди хьиз тир. Эхирни, мумкинвал хьайила, за дакIардай пул авай пакет акъудна, адаз ван къведайвал гьарайна: “Я дуст, вавай пул аватна”. Чинин рангар садлагьана дегиш хьайи ада улакь рекьин къерехда акъвазарна.

Пулунин иесидиз Шамхалаз, са шумуд агъзур манат пул гуналди, сагърай лугьуз кIанзавай. Амма азербайжанвиди къачунач. “Гьеле гъвечIи чIавалай зун диде-бубади чарадан шей къачун тийиз вердишарна. Мумкин я, пака зи кьилелни ихьтин дуьшуьш атун”, — лагьана ада.

Шамхалаз и кардикай масабуруз хабар хьана кIанзавачир. Амма адан дустуни и агьвалатдикай Интернетдин са сайтда кхьена.

Ат-Табараниди агакьарнавай са гьадисдай малум жезвайвал, Саид ибн аль-Асадин гафаралди, Мугьаммад Пайгъамбарди  лагьана: “Гьич са бубадивайни ви­чин веледдиз хъсан тербиядилай багьа маса са затIни гуз жедач”.

Винидихъ ахъайнавай агьвалатди тербиядихъ гьихьтин къуват, метлеб аватIа къалурзава. Гьакъикъатдани, тарашиз-къа­къуд­завай и девирда Шамхал хьтин инсанрин кьадар гзаф туш. Лезгийрихъ са мисал ава: “Аял — кье­пIинамаз, дана — епинамаз”. Гъве­чIи чIавалай дуьзгуьн тербия ганвай аялдикай жемиятдиз хийир авай инсан хкатда. Ахьтиндан уьмуьрни баркаллуди, чешне къачуниз лайихлуди жеда. Гьави­ляй, гьуьрметлу диде-бубаяр, тербиядин кьенерар бушармир. Ферли веледар хьун гьар садан мурад я.

Агьмед Магьмудов