США-дин тамам гуьзчивилик акатнавай, гьатта, тIуб юзурайлани, зурзаз акъваззавай Евросоюздик акатзавай уьлквейрин кьилер (Россиядин газдилай, нафтIадилай, чIулав ва рангунин металлрилай, техилдилай, миянардай шейэрилай (удобренийрилай)… аслу) чи уьлкведив душманвилелди эгечIзавай гьалар акурла, мягьтел жезва ва ажугъни акатзава. Абуру санал, Украинадин кьилиз атайбуруз къаюмвал ийиз, ана фашистар, бандеровчияр неонацистар майдандиз ахкъудна. Къе абуруз долларралди, евройралди, яракьралди куьмекни гузва. Муьжуьд йисуз абурув Донецкдал ва Луганскдал гьужумрин, терактрин гьерекатар ийиз туна. 15 агъзурдалай гзаф инсанар телефна.
Къе фашистар, неонацистар терг авун Россиядин Федерацияди вичин хивез къачуна. США, Евросоюз гьа алчахрин терефдарар хьанва ва Россиядиз 6 агъзурдалай гзаф санкцияр малумарнава. Гьа идалди чи уьлкведин экономика кIаняй акъудиз, халкьар кесибвиле тваз, гьукумдиз акси акъвазариз кIанзава. Ихьтин угъраш краралди, кьуьруькралди абурувай чи гьахълу рекьин вилик пад кьаз жедач. Россиядихъ гзаф миллетрин ватанперес халкь, вири четинвилериз дурум гудай мумкинвилер, душмандин гьерекатриз жаваб гудай яракь, гьакI дуствал хуьзвай уьлквеярни ава.
Алай макъамда Донецкдин, Луганскдин ва Украинадин маса шегьеррай катуниз мажбур хьанвай инсанар лап кIеве ава. Россиядин Федерациядин вири регионри абуруз рикIин сидкьидай куьмекзава. Суьрсетдалди, хсуси кIвалера чкаяр гуналди, мугьманвиле кьабулуналди. И муракаб гьалара дагъустанвиярни кьулухъ акъвазнавач. Абур гьамиша кIеве авайдаз куьмек гуз гьазурбур я. Гилани гьакI я.
14-мартдиз Дагъустан Республикади Донецк ва Луганск республикайрай Крымдиз къвезвайбуруз мергьяматлувилин куьмек рекье туна. ЧIехи вад автомашиндиз 80 тонндилай виниз жуьреба-жуьре парар (хъвадай яд, консервияр, суьрсет, яшайишда ишлемишзавай химиядин шейэр, медикаментар, парталар…) янавай.
Автомашинар рекье твазвай чкадал РД-дин Гьукуматдин Председатель Абдулмуслим Абдулмуслимова лагьана: “Сад тир Россия” партиядин Дагъустандин отделенидин секретарь Сергей Меликован тапшуругъдалди чна Ростов, Новгород областра ва Крым Республикада чка жагъанвай Донецкдай ва Луганскдай катнавайбуруз куьмек гудай рекьер жагъурзава. Мергьяматлувилин и гьерекатдик Дагъустандин хуьруьн майишатдин суьрсет гьасилзавай вири карханаяр экечIнава. Чна сифте нубатда геждалди амукьдай продуктар хкянава — шекер, гъуьр, консервияр, фан продуктар. Гьа са вахтунда республикадин гьукуматди кIеве гьатнавайбуруз рекье твадай шейэр гьазурунин кар давамарда. Зун кIевелай инанмиш я, дагъустанвийри Донбассдай катуниз мажбур хьанвайбуруз вири патарихъай куьмекар гуда”.
“Сад тир Россия” партиядин Дагъустандин отделенидин секретардин заместитель Мегьамед Мегьамедова лагьайвал, исполкомди шегьеррин ва районрин администрацийрихъ, общественный организацийрихъ, бизнесменрихъ, меценатрихъ, депутатрихъ, мергьяматлувилин фондарихъ галаз сихдаказ кIвалахзава ва сифте нубатда герек къвезвай шейэр, суьрсет кIватIун патал вири жуьредин серенжемар тешкилзава.
Хийир Эмиров
