Мегьарамдхуьруьн районда техилдин бегьер кIватIунин кIвалахар худда кьиле физва, хабар гузва райондин информациядин къуллугъди. Бегьер кIватIунив райондин вири жуьредин майишатра агротехникадин жигьетдай виридалайни къулай вахтунда эгечIнава ва планда фикирда кьунвай тегьерда кьиле физва.
Муниципальный райондин хуьруьн майишатдин отделдин эхиримжи делилралди, техилдин бегьер 800 гектар чилин майданрай кIватIдайвал я, 450 гектарда и кIвалах кьилиз акъудна куьтягьнава. Юкьван бегьерлувал са гектардай 21-23 центнердиз барабар я. Зулун магьсулар кIватIунин ва алафар гьазурунин кIвалахар районда давам жезва.
Техил кIватIунал махсус техника желбнава. Сифте техил кIватIзава, ахпа ам ратIрал хутахзава. Анал лагьайтIа, еридиз килигна, жуьреба-жуьре шешелра твазва. Гьялунин нетижада техил зирзибилдикай михьзава, кьурурзава ва гьамбарханадиз рекье твазва. Бегьер вахчунин карда райондин зегьметчийри активнидаказ иштиракзава.
Къейдзавайвал, райондин экономикадин кар алай хел тир хуьруьн майишат виликди тухунин ва ам мадни нетижалуди хьунин месэладиз муниципалитетдин руководстводи кьетIен фикир гузва.
«Лезги газет»
