Са шумуд югъ идалай вилик Кеферпатан Осетия-Алания республикадин Моздок шегьерда СКФО-дин субъектрин спортдин школайра вердишвилер къачузвай аялрин арада футболдай регионрин уртах турнир кьиле фена.
СКФО-дин виридалайни хъсан команда лагьай тIвар къазанмишун патал къизгъин бягьсера спортдин 12 коллективди чпин устадвал къалурна. Абурун арада Дербентдин 1-нумрадин ДЮСШ-да тежрибалу тренер Ибрагьим Султанован гъилик вердишвилер къачузвай гъвечIи футболистарни авай. Виликамаз кьиле тухвай 5 бягьсни гъалибвал къазанмишуналди акьалтIарай абуру финалдин акъажунра Ингушетиядай тир командадихъ галаз къуватар ахтармишна. Живеди кьунвай чIурал кьилин вахтунда Дербентдин ва Ингушетиядин командайрин къугъун сада муькуьдан варариз сад хьтин кьадар тупар ягъуналди акьалтIна. Алава вахт хгана. Гьайиф хьи, пенальтийрин нетижада 2:1 гьисабдалди Ингушетиядин команда гъалиб хьана. Дербентдин командади 2-чка кьуна.
Гъалибвал къазанмишай командайриз талукь дережайрин дипломар, медалар ва къиметлу пишкешар гана. Абурулай гъейри, тафаватлу хьайи са жерге футболистарни пишкешар гуналди къейдна. ИкI, турнирдин виридалайни хъсан варар хуьдайди яз Дербентдин “ТЕФИ” командадин капитан Мегьамед Абжуриев хкяна. Адан командадай тир Рустам Агьмедоваз ва Мугьаммад Алимурадоваз тамашачийриз хуш хьунай пишкешар гана.
“ТЕФИ” командадин футболистри, абурун диде-бубайри ва тренерри чпиз и турнирда иштиракун патал спонсорвилин куьмекар гайи ксариз — “ТЕФИ” тIвар алай алишверишдин фирмадин регьберриз — Тельман Гьамзаеваз ва Физули Сагъуеваз, гьакIни алишверишдин “Айсберг” фирмадин регьбер Руслан Агьмедоваз, 1-нумрадин ДЮСШ-дин директор Нежеф Эмирбеговаз Моздокда кьиле фейи турнирда иштиракдай мумкинвал гунай сагърай лугьузва.
Тофик Бахрамов
