Курхуьруьн 2-нумрадин юкьван мектебдихъ художественный самодеятельностдин хъсан коллектив ава. Ада мектебдин мярекатра, районда теклифзавай килигунра — конкурсра активвилелди иштиракзава, анра чпин бажарагъ раижзава.
Абурухъ галаз музыкадин муаллим Саругъланов Гуьлмета, Саругъланова Гьуьруьхалума (старший пионервожатый) гьар йикъан тешкилдай кIвалах тухузва. Нетижада бажарагъ авайбурун дережа мадни хкаж, алакьунарни ачухдиз малум жезва, цIийи къуватар майдандиз акъатзава. Исятда коллективда 15 ученик ава. Аялри чпин арада Межведилова Самирадиз екез гьуьрметзава. 3-классда кIелзавай Самиради гьеле мектебдиз фидалди манияр лугьузвай. Самира 1-классдиз атанвай вахт тир. Сифте яз райондин конкурсда иштиракна ва “Муаллим” мани лугьуналди, конкурсдин гъалибчивилин тIвар къазанмишна. Адаз райондин образованидин управленидин гьуьрметдин грамотани гана.
И агалкьуни медениятдин сергьятдиз сифтегьан камар къачунвай рушак еке гьевес кутуна. Ам мадни ашкъиламиш, адан активал мадни хкаж хьана. Къенин юкъуз Самира коллективда кар алайди яз гьисабзава. Адаз гзаф манияр, авазар чида, ширин, везинлу сесиналди абур лугьузва.
Самиради школадани хъсан къиметар аваз кIелзава. Ам вичелай чешне къалурзавай аял я. Адан шикил мектебдин Гьуьрметдин доскада ава. Чи мурад Самирадихъ еке агалкьунар хьун я.
Райсудин Набиев,
муаллим
