30-ноябрдиз Ахцегьрин В.Эмирован тIварунихъ галай 2-нумрадин мектебда лезги чIалал акъатай сад лагьай газетдин редактор, латин графикадин бинедаллаз лезги чIалан алфавит арадал гъайи алим Гьажибег Гьажибегован 120 йис тамам хьунин сергьятра аваз лезги публицистикадай конкурс кьиле фена.
Мярекат тешкилайбурун арада Алкьвадар Гьасанан тIварунихъ галай медениятдинни марифатдин центр ва “Лезги газетдин” редакция авай. Ахцегь районда конкурс кьиле тухунин карда муниципалитетдин администрациядин образованидин управлениди ва “ЦIийи дуьнья” газетдин редакцияди куьмекна.
Конкурсда райондин мектебра 9-11-классра кIелзавай аялри (гьар са классдай — 1 аял, вири -35) иштиракна. Жюридин председатель — РУО-дин начальник Халидин Эльдаров, членар — “ЦIийи дуьнья” газетдин кьилин редактор Дашдемир Шерифалиев, РУО-дин ИМЦ-дин начальник Заира МутIалибова, ИМЦ-дин методист Ильмара Велиева тир.
Конкурсдин нетижада 1-чка — Къурукаларин мектебдин 9-классдин ученица Ханум Эльдаровади, 2-чка — Ахцегьрин 2-нумрадин мектебдин 11-классда кIелзавай Милана Агьмадовади ва 3-чка Ахцегьрин 1-мектебдин 10-классда кIелзавай Ханумсултан Генжалиевади кьуна. Гъалибчийриз винидихъ тIвар кьур центрадин патай (директор — Мегьамед Ибрагьимов) патай дипломарни 7, 5, 3 агъзур манатдин кьадарда аваз пулдин пишкешар гана.
Дашдемир Шерифалиев
