Пенсия — картадиз

Пенсия туькIуьрун патал арза вугудайла, гьар са касдивай вичив пенсия агакьардай тегьер хкягъиз жезва. Пенсия къачунин жигьетдай жуьреба-жуьре тегьерар­ ава, амма пенсионерри гзафни-гзаф банкунин картадиз ракъурунин къайда хкязава. Гьелбетда, гьар са пенсионерди вичиз къулай тегьер гьим ятIа, гьам тайи­нарзава.

Пенсия картадиз агакьаруникди пенсионер нубатра­ акъвазуникай ва я, кIвализ хкана, пенсия гудалди вил алаз акъвазуникай азадзава. Гьа са вахтунда вуна гьи къай­да хкягъайтIани, яшайишдин гьалар дегиш хьунихъ­ ва я маса месэладихъ галаз алакъалу яз, гьар са пенсионердивай вичин хушуналди пенсия агакьарунин къайда дегишариз жеда.

МФЦ-дин идарадиз фена, пенсия картадиз ракъурунин арза вугуз жеда. Пенсиядин иесидив паспорт ва банкунин реквизитар гваз хьун чарасуз я.

Полис тIалабдач

ОМС-дин сергьятра аваз медицинадин куьмекдикай менфят къачудайла, полис къалурунин гереквал амукьзавач, паспорт ва я хайивилин гьакъиндай шагьа­датнама бес жеда. Гьа са вахтунда вердиш хьанвай къайдада медицинадин полис гваз фейитIани жезва.

1-декабрдилай къуватда гьатнавай къанундал асаслу яз, медкуьмек къачун патал чарчин полис къалурун чарасуз яз амукьзавач.

ФОМС-ди сад тир регистр кардик кутадайвал я. Ди­дедиз хьанвай аялдин ва я РФ-дин ватандашвал кьабулнавайдан делилар (полисни) регистрда пайда жеда. ОМС-дин электронный полис ватандашдин “Госкъуллугъра” кардик квай хсуси кабинетда жеда.

Чарчин ва я пластикадин полис герекзавайбуру ме­дицинадин страховой тешкилатдиз арза вугун герек я.

Зирзибилдин гьакъи

Гзаф квартирайрикай ибарат кIвалин агьалиди яшайишдин амукьаяр (зирзибил) тухунин къуллугъди­кай вахтуналди менфят къачузвачтIа, месела, отпуск­диз ва я командировкадиз фенватIа, адавай гьакъи­дин гьахъ-гьисаб (перерасчет) истемишиз жеда.  Идан гьакъиндай РФ-дин Гьукуматдин Председатель Ми­хаил­ Мишустина къарардал къул чIугунва. ЦIийи къайда 2023-йисан 1-мартдилай кардик акатда.

ЦIийи къарар, гьам кIвале прописка авунвай ксарин кьадардиз килигна, тайин тарифдай гьа­къи гузвайбурузни, гьам яша­миш жезвай чкадин майдандиз килигна, гьа­къи гузвайбурузни талукь я.

Зирзибил тухунай гузвай гьакъидиз цIийи кьилелай­ килиг хъувун патал идара ийизвай тешкилатдиз (управляющий компания) арза кхьин ва адахъ кIвале тайи­н вахтунда хьанвачирдан гьакъиндай тестикьарзавай документар гилигун герек я. Месела, туриствилин путевкаяр ва я авиабилетар.

Къейд ийин, перерасчет 5 йикъалай виниз кIвале тахьай агьалийриз талукь я.

«Лезги газет»