«Чна чи кIамарикай вацIар авуна кIанда», — лугьудай зи рагьметлу дахди (лезги шаир, публицист Шамсудин Исаева — ред.). ЧIехи метлеб авай мисал я. Чна чи пад хуьнилай, сада-садаз куьмек гунилай, герек чкадал тариф авунилай вири халкьдиз талукь гзаф крар аслу я. Тарифдиз ла­йихлу инсанар лагьайтIа, чи ватанэгьлийрин арада тIимил авач. Къе заз гьахьтинбурукай сад тир Кьурагьрин уьтквем руш Бугъадбурун Мариянакай куьруь ихтилат ийиз кIанзава.

Мариян муаллим уьмуьрлух вичин зегьметдалди къазанмишнавай гьалал фу незвай кас я. Далудихъ я еке гьакимар, я арха-халуяр галачиз, вичи-вичиз рехъ жагъуриз, ам гьяркьуь ийиз чирвилерихъ, савадлувилихъ ялна­ ада. Хейлин йисара меркездин мектебрикай сана акьалтзавай несилриз хайи чIалай чирвилерни тербия гайи Мариян Бугаева къе республикада гьуьрмет авай муал­лимрикай сад я. Адаз халкьдин муаллим лагьайтIани жеда. Шумуд несилдин векилриз ада лезги чIални эдебият чирна! Адан тарсар туькIуьр хьунин тегьердалди, методикадин къайдайралди тафа­ватлу жезвай. Гьар са ученикдив­ рикI куз, кIанивилел­ди, сабур­ди­в­ди эгечIна ам. Адан къаст аялрикай дуьз инсанар хкудун тир. Аялрини и регьимлу дишегьли неинки муаллим хьиз, гьакIни  чпиз лап мукьва, багьа кас хьиз кьа­булна.

Советрин вахтунда партиядин буйругъдалди Кьурагьрин хуьруьн кавхавални авурди я и кьегьал дишегьлиди!

Мариян муаллим алай вахтунда пенсиядиз экъечIнава. Ял ядай вахт ятIани, адаз кIвалах тавуна кьарай къвезвач. Мариян муаллим Махачкъалада кьиле физвай чи халкьдин милли саки вири мярекатрин гьевеслу иштиракчи я. Къе хьиз рикIел алама, ада Кьуьчхуьр Саидан юбилейдин межлисдал авур ихтилатриз жемятди, кIвачел къарагъна, гурлу капар янай. Акъваз тийиз, вичивай жедайвал, чи кьегьал рухвайрикай, Лезгистандикай шиирар кхьизва, ктабар акъудзава. Аферин!

Зегьметдин ветеран Мариян муаллимдин  чан сагърай, дуланажагъ хъсан хьурай. Авур хъсан крарай адаз Худади сувабар кхьирай!

Расим Исаев