Алай йисан 5-февралдиз РД-дин Гьукуматдин Председателдин заместитель Рамазан Жафарова Дагъустан Республикадин экономика, къецепатан гьаларни фикирда кьуна, дурумлувилелди вилик тухун таъминарунин рекьяй оперативный штабдин заседание кьиле тухвана.
Мярекатдин иштиракчийри гьукумдин региондин ва муниципалитетрин органар агьалийрин арзайрив эгечIзавай гьалдин нетижаяр ва «Дагъустан Республика целди таъминарунин ва яд тухунин къурулушар сад ийидай оператор» АО-дин базадал Махачкъала шегьер целди таъминарунин, яд тухунин ва чимивал гунин къурулушар сад авунин месэлаяр веревирдна.
Заседание оперативный штабдин вири иштиракчийрин тIварунихъай Дагъустандин Кьил Сергей Меликоваз уьмуьрдин юлдаш Галина Анатольевна Меликова, Россиядин Игит, капитан Дмитрий Серкован (ам 2007-йисуз Дагъустанда террористрихъ галаз кьиле тухвай женгина телеф хьана) диде рагьметдиз финихъ галаз алакъалу яз башсагълугъвал гунилай гатIунна.
Йикъан месэладив эгечIуналди, Рамазан Жафарова къейдна хьи, республикадин гьукумдин органри уьмуьрдин жуьреба-жуьре хилера арадал къвезвай крарилай агьалийри ийизвай арзаяр вахт-вахтунда ахтармишун давамарзава.
«Агьалийри хабар гузвай татугайвилерикай чIехи пай, гьайиф хьи, яшайишдинни коммунальный майишатдин кIвалахдиз талукь я. Алай вахтунда аквазвайвал, агьалийрин арзайриз вахтунда жаваб гунин ва татугайвилер арадай акъудунин вахтар яргъал вегьезвач.
Гьукумдин органрин руководителрин, районрин ва шегьеррин кьилерин, агьалияр герек ресурсралди таъминарзавай организацийрин сагьибрин фикир а кардал желб ийиз кIанзава хьи, ЖКХ-дин хиле арадал къвезвай кьван татугайвилер арадай акъудуниз талукь кIвалахрикай агьалияр тамамвилелди ва вахтунда хабардар авун лазим я», — лагьана Р.Жафарова.
Алатай гьафтеда соцсетра агьалийрилай атай 4 агъзурдав агакьна арзаяр къейднава.
Соцсетра агьалийри ийизвай арзайриз гьукумдин органри жаваб гузвай гьалдикай РД-дин ЦУР-дин кьил Ислам Мусаева суьгьбетна. Адан гафаралди, алатай гьафтеда республикадин гьукумдин органар агьалийрин 2 агъзурдалай виниз арзайриз килигна. Санлай къачурла, 2024-йисан 29-январдилай 4-февралдалди ЦУР-диз 3962 арза атана. Алатай гьа и вахтунив гекъигайла, и рекъем 571 арзадин гзаф я.
Агьалийрин арзаяр гзафни-гзаф кIвалер, идараяр электричестводин токдикай хкудуниз ва къайи яд тахьуниз талукьбур тир. Гьа са вахтунда инсанрик куьчейрин, рекьерин ерисузвили, светофорар виринра ва вахт-вахтунда кIвалахдик тахьуни, жемиятдин майданар аваданламиш тавуни, бязи районра аялрин майданар авачирвили, зирзибил вахт-вахтунда тухун тавуни ва иесисуз гьайванар куьчейра хьуни секинсузвал кутазва.
Агьалийрин патай авунвай арзайрал гьалтайла, сад лагьай чкадал Махачкъала шегьер ала. Адалай гуьгъуьна Каспийск, Дербент ва Къизилюрт ава.
Ихьтин делилрихъ галаз сад хьиз, Ислам Мусаева гьукумдин органри агьалийрин арзайриз вахтунда килигзавай ва абур кваз такьазвай жуьредин мисаларни гъана. ИкI, мисал яз, РД-дин транспортдин ва рекьерин майишатдин министерстводи Махачкъала шегьердин Семендер поселокдин агьалийрин тIалабун гъиле-гъил аваз кьилиз акъудна. Тайин чкадал светофор эцигна.
Заседанидин нетижаяр кьуналди, Р.Жафарова талукь руководителрал агьалийрин арзайриз гьамиша фикир гун, республикадин экономика дурумлувилелди вилик фин таъминардай серенжемар кьабулун, районрин муниципалитетрин кьилерал чкайрал арадал къвезвай татугай гьалар, яргъал тевгьена, къайдадик кутун тапшурмишна.
Хийир Эмиров
