5-февралдилай гьаваяр дегиш хьуникди Дагъустандин са жерге районра къалин живер къвана, къати гарар акъатна. Нетижада гзаф кьадар хуьрера эквер хкахьна, рекьер къайдадикай хкатна. Ихьтин гьалар арадай акъудун патал кьабулзавай серенжемрикай накь Махачкъалада кьиле фейи совещанидал РД-дин Гьукуматдин Председатель Абдулмуслим Абдулмуслимоваз РД-дин МЧС-дин министрдин заместитель Эльдар Атаева хабар гана.
Э.Атаеван гафаралди, гьавадин мишекъат шартIар себеб яз, 15 райондин 133 хуьре эквер хкахьна. Бежта участокда, Тлядал ва Анцух хуьрерин арада авай рекьиз живедин маргъал авахьна. Къалин живер къуникди ЦIунтIа ва Гумбет районра бязи рекьер вахтуналди агал хьана.
Тади гьалда кьабулай серенжемрин нетижада бязи рекьер къайдадик кухтуна, хейлин хуьрериз эквер хгана. Амма гуьнгуьна хтунин кIвалахар акьалтIнавач. Э.Атаева къейд авурвал, талукь къуллугърин пешекарри кIвалахар давамарзава. Кьилди къачуртIа, 10 райондин 53 хуьруьз эквер хгун патал лазим серенжемар кьабулзава.
«Лезги газет»
