Кьурагь район тIебии жуьредин татугайвилер арадал атунин хаталувал авай чкайрик акатзава. ИкI, райондиз гьар йисуз гагь къати гарари, гагь селлери, хару ва маса бедбахтвилери зиянар гузва.
Муниципалитетдин администрациядин пресс-къуллугъди хабар гузвайвал, 19-сентябрдин нисинин сятдин 1-даз “Кьурагь район” МО-дин администрациядин Сад тир дежурный диспетчервилин къуллугъдин начальник Анвар Нурмегьамедов Дагъустандин кризисдин гьаларин Центрадай Кьурагь райондин “Икринский сельсовет” муниципалитетдин мулкара там кузвайдан патахъай хабардарна. Ада и кар гъиле-гъилди “Кьурагь район” МО-дин кьил Замир Азизоваз ва райондин КЧС-дин председатель Жаврудин Халикьоваз раижна. Абуруни райондин пожарный къуллугъдин начальник Ибрагьим Мегьамедовахъ галаз санал 50 касдикай ибарат штаб тешкилна. Аник пожарникрилай гъейри, КIирийрин, КьепIиррин умуми образованидин юкьван школайрин ва КIирийрин спортшкола-интернатдин къуллугъчияр ва чIехи классра кIелзавай аяларни кутуна. Абур Сулейман-Стальский райондинни Кьурагь райондин сергьятдал алай “КIири бубадин булах” лугьуз тIвар акъатнавай таму цIай кьунвай чкадиз атана ва, лазим серенжемар кьабулуналди, са куьруь вахтунда цIай хкадарна.
Штабдиз регьбервал гайи Замир Азизова цIай хкадарунин карда иштиракай вирибуруз рикIин сидкьидай сагърай лагьана.
Россиядин МЧС-дин Дагъустан Республикада авай Кьилин управлениди хабар гузвайвал, 2017-йисан алатнавай девирда Дагъустанда цIаяр кьунин 572 дуьшуьш хьана. Нетижада цIаяр кьуни гайи зиянрин кьадар 84 миллион манатдилай алатна.
ЦIаяр кьунин са паюнилай гзаф дуьшуьшар яшайишдин кIвалерал гьалтзава. ЦIи ахьтин 267 дуьшуьш хьанва.
«Лезги Газет»
