Алатай гьафтеда Дагъустандин Гьукуматдин Председатель Абдусамад Гьамидова ва Дербент шегьердин кьил Малик Баглиева къадим шегьердин агьалийрив цIийи квартирайрин куьлегар шадвилин гьалара вахкана.
И сеферда У.Буйнакскийдин тIварунихъ галай куьчеда эцигнавай гзаф квартирайрин кIваляй 27 хизандиз квартираяр чара авуна.
ИкI Дербентда, санлай республикада са жерге маса кIвалер хьиз, и кIвални 2013-2017-йисара Дагъустан Республикада агьалияр чкIидай гьалда авай яшайишдин кIвалерай масанриз ахкъудунин тайин программа уьмуьрдиз кечирмишунин сергьятра аваз эцигнавайди я.
“И программа бажармишунин нетижада вири уьлкведа агьалияр чкIидай гьалда авай чкайрай цIийи ва къулайвилер авай яшайишдин кIвалериз экъечIзава. Программадин кьуд лагьай пай виридалайни четинди я. Чна санлай 25 агъзур квадратный метрдин майдан авай яшайишдин кIвалер ишлемишиз вахкун герек я. Са тIимил вахтар идалай вилик чна Дербентда нубатдин кIвал ишлемишиз вахкана, аниз 24 хизан куьчарна. Къе цIийи квартирайриз куьч жезвайбурун кьадар мадни гзаф я. Дарамат са куьруь вахтунда хкажна. Гьа са вахтунда виликдайни и районда яшамиш жезваз ва масаниз экъечIиз кIан тийизваз хьайи, гележегда чпикай цIийи квартирайрин иесияр жедай ксарин майилвилерни гьисаба кьуна. За квез виридаз цIийи кIвалериз экъечIун мубаракзава, квев и квартирайра еке бахтар агакьун, чна вирида санал чи умуми Ватан тир Россиядин хушбахтвал патал кIвалахун алхишзава”, — лагьана Абдусамад Гьамидова.
Премьер-министрди дарамат хкажай эцигунардайбуруз сагърай лагьана ва, кьилди къачуртIа, карчи Брем Бремовав “Дагъустан Республикадин лайихлу эцигунардайди” лагьай гьуьрметдин тIвар ганвайвилин удостоверение вахкана.
ЦIийи квартирайриз экъечIнавайбуруз абурун уьмуьрда хьанвай и шадвал Дербентдин мэр Малик Баглиевани мубаракна. Идалай гъейри, ада Дагъустандин руководстводин тIварцIихъни разивилин чими келимаяр лагьана.
Рахунар куьтягь хьайидалай гуьгъуьниз Абдусамад Гьамидова дербентвийрин 27 хизандив цIийи квартирайрин куьлегар вахкана.
ЦIийи кIвалериз экъечIзавай агьалийрин тIварунихъай Татьяна Рыбак рахана. А.Гьамидова Рыбакан хизандиз Дагъустандин Гьукуматдин тIварунихъай телевизор багъишна.
РД-дин Кьилин ва Гьукуматдин пресс-къуллугъ
