КIвалахдин рекьяй Бакуда авай чIавуз РД-дин Халкьдин Собранидин Предсе­датель Заур Аскендерова Азербайжандин Милли межлисдин Председатель Сагьиба Гъафаровадихъ галаз Россиядинни Азербайжандин часпардилай инсанар элячIдай пунктар ачух хъуву­нин месэлани веревирдна. Идакай «Лезги газетдиз» республикадин парламентдин пресс-къуллугъди хабар гана.

Гуьруьшдин вахтунда Заур Аскендеро­ва государстводин часпардилай элячI­­дай пунктар кардик кухтунихъ ­Рос­­сиядинни Азербайжандин арада­ ме­де­ниятдинни тарихдин ва экономика­дин­ алакъаяр мадни вилик ту­хунин жигьетдай еке метлеб авайди къейдна.

Дагъустандин делегацияди и кар гъиле кьадалди вилик чи ватанэгьлияр къунши уьлкведа авай чпин мукьва-кьилийрин патав фин-хтун регьятарун патал часпардилай элячIдай автобусрин алакъа кардик кутун теклифна.

Веревирд авур месэладин пата­хъай Сагьиба Гъафаровадин фикирар гьихьтин­бур ятIа, Дагъустандин Халкьдин Соб­рани­дин сайтда чапнавай малуматда­ къейд­навач. Милли межлисдин сайтда ганвай и гуьруьшдиз талукь макъаладани­ ихтилат физвай месэладин гьакъиндай са келимани авач. Са гафуналди, месэла гьялна мус акьалтIардатIа, гьелелиг малум туш.

РикIел хкин, Россиядинни Азербайжандин арада авай часпардилай инсанар элячIдай пунктар агална са шумуд йис я. И кар себеб яз, хейлин чи ватанэгьлийриз Самур вацIун кьве патани авай чпин мукьва-кьилийрин хийир-шийирдик иштиракун четин хьанва.

Чи  мухбир