Рекъемар раижна

ЦIуд вацран нетижайралди Дагъус­танда вахкай яшайишдин кIвалерин кьадар 3 миллион кв. метрдиз мукьва хьанва. Идакай «Дагъустан» РИА-ди хабар гузва. 2024-йисан алатнавай 10 вацра 2 миллионни 827 агъзур кв. метр кIвалер яшамиш хьун патал вахканва. Къейдзавайвал, 2023-йисан и муддатдив гекъигайла, им саки 1,5 сеферда ва я 1 миллионни 682,8 агъзур кв. метрдин гзаф я.

Чешмеди гъизвай делилрай малум жезвайвал, кьилди къачуртIа, республикадин яшайишдин кIвалерин фондуна анжах са октябрдин вацра 117 агъзур цIийи «квадрат» артух хьанва.

Хкаж хьанва

Дагъустанди 2024-йисуз яшайишдинни экономикадин кар алай рекъемар хкаж хьанвайди тайинарнава. Идакай, РД-дин Гьукуматдин телеграм-каналдал асаслу яз, «Интерфакс» изданиди хабар гузва.

ИкI, республикадин премьер-ми­нистр Абдулмуслим Абдулмуслимован­ гафарал­ди, хуьруьн майишатдин продук­ция гьасилунин кьадар 2024-йисан­ ян­варь-ноябрь варцара 228,7 миллиард манатдиз барабар хьанва. Им, алатай йисан­ и муддатдив гекъигайла, 6 процентдин гзаф я.

Ада раижзавай къейдерай гъавурда акьазвайвал, хуьруьн майишат вилик ­финин кIвалах гьукуматди гьам федеральный, гьамни республикадин бюд­жетрин гьисабдай куьмек гузвай рекьер артух хьунихъ ва маса серенжемрихъ ­галаз алакъалу я. А. Абдулмуслимова­ гъизвай делилрай малум жезвайвал, кьилди къачуртIа, алай йисуз кIватI хъувур прунздин кьадар 165 агъзур тонндив агакьнава

Промышленностдин хилени шей гьасилун са жерге рекьерай артух хьанвайди виле акьазва.

Раижзавайвал, эцигунрин хилер алай йисан­ 11 вацра 189,8 миллиард манатдин кIва­лахар тамамарнава. Шазан и муддатдив гекъигайла, и рекъем 2 процентдин виниз акъатнава.

Чешмеди къейдзавайвал, 11 вацран­ къене кура-кура маса гунин алишвериш­да къекъвезвай пулдин кьадар 801 мил­лиард манатдилай алатнава. Им, 2023-йисан и муддатдив гекъигайла, 1,4 процентдин гзаф я. Метягьар маса гунин-къачунин (то­варооборот) кьадар 161,21 миллион доллардикай ибарат хьанва. Къейдзавайвал, алатай йисан и муддатдив гекъигайла, им 5 процентдин гзаф я.

Пулдин такьатар къачуда

Уьлкведин гьукуматди регионриз хуьруьн майишатдин чилерал мелиорациядин кIвалахар тухун патал алава яз 630 миллион манат чара авунва. Идакай, федеральный кабминдин пресс-къуллугъдал асаслу яз, «Дагъус­тан» РИА-ди хабар гузва.

Чешмеди раижзавай къейдерай гъа­вурда акьазвайвал, 2024-йисан эхирдалди пулдин такьатар 15 региондиз рекье твада, анра мелиорациядин кIвалахрал машгъулбуру авур харжийрин са кьадар пай эвез хъувун патал.

Хабар гузвайвал, пулдин такьатар ихьтин игьтияж авайдакай малумарай Башки­рияди, Дагъустанди, Кабардино-Бал­ка­рияди, Якутияди, Кеферпатан Осетияди­, Краснодардин, Ставрополдин крайри, Брянск­дин, Волгограддин, Воронеждин, Калининграддин, Нижний Новгороддин, Рязандин, Саратовдин, Ульяновскдин областри къачуда.

Къейдзавайвал, алава такьатар гидромелиорациядин ва маса серенжемар кьиле тухуниз харжда. И серенжемри хуьруьн майишатда ишлемишдай чилерин фонд ге­гьеншардай мумкинвал гуда. И делилди­ вичин нубатда агропромышленный комп­лекс дурумлудаказ вилик тухун таъминарда. Нетижада уьлкведин недай суьрсетдин хатасузвилиз талукь макьсадрив агакьда.

6,6 агъзур ­манатдал кьван

2024-йисан ноябрдин вацран нети­жайралди, Дагъустанда суьрсетдин кIва­тIалдин (продуктовый набор) къимет (вацран къене) саки 2 процентдин багьа хьанва — 6,6 агъзур манатдал кьван. Идакай, Да­гъустанстатдин материалрал асаслу яз, «Дагъустандин экономика» телеграм-каналди хабар гузва.

Чешмеди къейдзавайвал, СКФО-дин регионрин арада суьрсетдин кIва­тIалдин къимет виридалайни гзаф Ка­рачаево-Черкесияда багьа хьанва — саки 4 процентдин, 6 агъзурни 672 манатдал кьван.

РикIел хкин, виликдай «Дагъустан­дин­ экономика» телеграм-каналди раиж авур­вал, гьар вацра инсандал гьалтза­вай суьр­сетдин кIва­тIалдик акатзава: саки­ 15 ки­лог­рамм фу ва чIахар, 1,5 килог­рамм емишар ва гьакьван ширинлухар, 1,2 ки­лог­рамм ба­лугъ, 18 килограмм некIедин суьрсетар ва мсб.

Гьазурайди — Муса  Агьмедов