СтIал Сулейманан – 155 йис
ЦIинин йис Дагъустан вири дуьньядиз машгьур авур сад лагьай шаир яз гьисабзавай СтIал Сулейманан юбилейдинди тир. Республикадин Кьил Сергей Меликован Указдалди алай йисуз XX асирдин Гомер дидедиз хьайидалай инихъ 155 йис тамам хьун гегьеншдиз къейдна. Идалай вилик чIехи шаирдин юбилейдин мярекатриз ихьтин дережада аваз фикир гайиди тушир. Шак алачиз, им сифте нубатда Сергей Меликован агалкьун язни гьисабиз жеда. ЦIи шаирдин юбилейдихъ галаз алакъалу яз Дагъустанда кьиле фейи лишанлу бязи мярекатрикай и нумрадин 12-чина чапнавай Куругъли Ферзалиеван макъалада раханва. Амма СтIал Сулейманан 155 йис тамам хьуниз талукьарнавай межлисар неинки са Дагъларин уьлкведа, гьакI уьлкведин маса регионрани, са жерге къецепатан уьлквейрани кьиле фена.
ИкI, 23-декабрдиз Азербайжандин меркез Баку шегьерда, Урус кIвалин дараматда, СтIал Сулейманан юбилейдин мярекат тешкилнавай. Лезги театрдин артистри XX асирдин Гомеран уьмуьрдин ва яратмишунрин рекьикай малуматар гана, сегьнейрай чIукар къалурна, манияр тамамарна. Идалай гъейри, иштиракчийрихъ шаирдин суьретрин ва ктабрин выставкайрихъ галаз таниш жедай мумкинвални авай.
Саламдин чар гваз мярекатдин мугьманрин вилик РД-дин Халкьдин Собранидин Председатель Заур Аскендеров рахана. Ада РД-дин Кьил Сергей Меликован ва Дагъустандин гзаф миллетрикай ибарат халкьдин патай иштиракчийрив тебрикдин гафар агакьарна ва чIехи шаирдин ирсинив къайгъударвилелди эгечIунай стха азербайжан халкьдиз сагърай лагьана.
Дагъустандинни Азербайжандин арада медениятдин рекьяй авай алакъайрин важиблувиликай рахадайла, Заур Аскендерова СтIал Сулеймана вичин шиирар азербайжан чIалални кхьейди ва шаирдиз и чIал фасагьатдиз чизвайди рикIел хкана.
«Адан шииратда кесиб халкьдин пашманвилеринни шадвилерин рангар авай. ЧIалан устадди фасагьатдиз, успагьивилелди, айгьамдалди девирдин нукьсанар винел акъудзавай, абур меземмет ийизвай, гьахълувилихъ эвер гузвай.
СтIал Сулейманан яратмишунрин алемди кIелзавайбур гьейранарзава. Адан жавагьирар хьтин эсерар чпин рангар гьич садрани тефидай лишанар хьиз я. ТIвар лагьайтIа, жемиятдин гегьенш къатариз машгьур я. Шаирдин шиирар хейлин чIалариз таржума авунва ва абуру жуьреба-жуьре миллетрикай тир агъзурралди инсанрин рикIера чка кьунва.
СтIал Сулейманан тIвар эбеди я. Адан яратмишунри, фикирри, къастари алай вахтундани нефес къачузва. Ам, гьакъикъатдани, Дагъустандинни Азербайжандин арада авай алакъаяр мягькемарзавай, садзавай къуватдиз элкъвенва», — къейдна Заур Аскендерова.
Шииратдин межлисдин сергьятра аваз, Азербайжанда Россиядин Федерациядин Векил Михаил Евдокимов, Азербайжандин Милли межлисдин медениятдин комитетдин председатель Полад Буьльбуьль огълы ва масабур рахана, шаирдин яратмишунрин алемдикай чпин фикирар лагьана.
СтIал Сулейманан 155 йисан юбилейдиз талукьарнавай мярекатар алай вацра Къиргъизиядин меркез Бишкек шегьердани тешкилнавай. Ана кьиле РД-дин милли сиясатдин ва динрин крарин рекьяй министр Энрик Муслимов авай Дагъустандин чIехи делегацияди иштиракна.
Къиргъизия Республикадин К. Баялинован тIварцIихъ галай ктабханада кьиле фейи мярекатдин кьилин тешкилатчийрин арада Къиргъизияда Россотрудничестводин Векилханадин къуллугъчи Эсма Хагба, «Къиргъизияда авай Дагъустандин халкьарин Ассоциация» ОО-дин регьбер Абдурагьман Муртазалиев, тарихчи ва жемиятдин деятель Руслан Мегьамедов, урус чIаланни эдебиятдин муаллим Шолпан Момункулова авай.
…СтIал Сулейманан юбилейдин мярекатар гьакIни Узбекистанда, Белоруссияда ва масанрани кьиле фена. ЧIехи шаирдин яратмишунри, тIварцIи жуьреба-жуьре халкьар сад авун давам жезва. Къуй инлай кьулухъни гьакI хьурай!
Агьмед Магьмудов
