13-июлдиз Дагъустандин Кьил Сергей Меликов республикадин виридалайни виниз тир агалкьунар хьанвай выпускникрихъ ва Вирироссиядин мектебра кIелзавай аялрин арада олимпиадайрин (ВсОШ) гъалибчийрихъ, ЕГЭ-дин имтигьанар 100 баллдин къимет къачуналди вахкай ва жуьреба-жуьре конкурсра гъалиб хьайи жегьилрихъ галаз гуьруьшмиш хьана. Агалкьунар хьанвай жегьилриз, 2021-йисалай инихъ адет хьанвайвал, республикадин Кьили пулдин пишкешар гана. Дагъустандин Гьукуматдин къарардин бинедаллаз, и рекьиз 3 миллионни 800 агъзур манат чара авунвай. Мярекат Махачкъалада авай Дуствилин кIвале кьиле фена. Ана РД-дин Гьукуматдин Председателдин заместитель Муслим Телякавова, РД-дин образованидин ва илимдин министр Яхья Бучаева ва адан сад лагьай заместитель Аида Далгатовади, гьакIни са жерге мектебрин директорри иштиракна.
Сифтени-сифте Сергей Меликова чирвилер къачунин карда еке агалкьунар хьанвай аялар тебрикна.
«Куьне, гьакIни, гьелбетда, куь насигьатчийри, муаллимри ва диде-бубайри вири къуватар эцигна зегьмет чIугур варцар ва йисар гуьгъуьна ама. Виниз тир баллралди тамамарай гьар са кIвалах, Вирироссиядин олимпиадайра, яратмишунрин ва интеллектдихъ галаз алакъалу конкурсра гьар са гъалибвал – им еке ва муракаб рекьин нетижа я», — лагьана Дагъустандин Кьили.
Чна идалай виликни хабар гайивал, алай йисуз Дагъустанда ЕГЭ 12 агъзур выпускникди вахкана. Абурукай 29 жегьилди 100 баллдин къиметар къачуна. Сергей Меликова къейд авурвал, Насигьатчидин ва муаллимдин йисуз икьван хъсан нетижайрив агакьун – им кьетIен шадвал кутадай кар я.
«Эхиримжи йисара, санлай къачурла, чи республикадин мектебра кIелзавай 15 аялди Вирироссиядин дережадин олимпиадайра пишкешдин чкаяр кьуна, абурукай пуд кас математикадай ва химиядай олимпиадайра кьве сеферда пишкешдин чкайриз лайихлу хьана. Алай йисуз, ВсОШ-дин эхиримжи паюна Дагъустандин мектебра кIелзавай 25 аялди иштиракна», — дамахдивди къейдна республикадин Кьили.
Пуд жегьилдикай ада кьетIендаказ лагьана: урус чIалай ва биологиядай ЕГЭ-рай гьардай 100 балл къазанмишнавай ва вич ихьтин агалкьунар хьанвай тек сад тир Гьаваханум Мегьамедовадикай (Табасаран район), гьар жуьредин гзаф кьадар олимпиадайрин иштиракчи, гьакIни математикадай ЕГЭ-дай 100 балл къачунвай Гьамид Алиевакай (Махачкъала) ва ингилис чIалай ВсОШ-дин пишкешар, гьакIни урус чIалай ЕГЭ-дай 100 балл къачунвай Патимат Самедовадикай (Махачкъала).
«Куьн чи гележег я. Заз куьне мектебда кIелунин карда хьанвай агалкьунар вири уьмуьрдин агалкьунриз элкъуьрунин алхишар ийиз кIанзава. И кар лагьайтIа, квелай гьикьван намуслу ва жумартлу макьсад исятда вилик эцигиз ва рикI алай кеспи жагъуриз алакьдатIа, гьадалай аслу я. Высший образование гьина къачуртIани, квекай гьар садавай вичин къуватар ва мумкинвилер республикада уьмуьрдиз кечирмишиз жеда. Къуй квехъ мадни цIийи гъалибвилер ва агалкьунар хьурай!», — алава хъувуна ада.
Идалай гуьгъуьниз ада 100 баллар къазанмишнавай ва олимпиадайра гъалиб хьайи аялрив 100 агъзур манатдин сертификатар вахкана. Региондин Кьилин пресс-къуллугъди хабар гайивал, пулдин сертификатар гьакIни олимпиадайра кIвенкIвечи чкаяр кьур аялризни, абурун насигьатчийризни гана. Лагьана кIанда хьи, са шумуд рекьяй агалкьунар хьанвай аялриз 100 агъзур манатдин сертификатар гьар са рекьяй гана – и карди жегьилар кIелунин рекье мадни гьевеслу авуна.
Гуьруьшдин эхирдай мектебра кIелзавай аялрини, абурун муаллимрини республикадин руководстводиз чирвилерин рекье авай жегьилриз куьмек гунай чухсагъул лагьана ва виниз тир дережайрив агакьнавай аялрин кьадар йисалай-суз артух хьуник умудар кутуна.
Амина Муслимова
