19-21-августдиз Мегьарамдхуьруьн райондин Приморский хуьре авай сагъламвал мягькемардай «Самур» лагерда Кьиб­лепатан Дагъустандин студент­рин пуд лагьай слёт кьиле фида­. Мярекат жемиятдинни сия­сат­дин машгьур деятель, меценат­ Мамед Абасован куьмекдалди­ «Кьиблепатан Дагъустандин же­гьилрин Союз» ДРОО-ди тешкилзава. Къейд ийин хьи, М.Абасов и тешкилатдин къаюмвалдай советдин председатель я.

Пуд лагьай сеферда кьиле­ ту­хузвай и мярекат ви­ли­кан­бу­ру­­лай тафаватлу жеда­. Кьилди къа­чуртIа, цIи слётдин сергьят­ра аваз образованидин, спортдин хилериз талукь тренингар, серенжемар, гьукумдин органрин, карчивилин, яратмишдай интеллигенциядин векилрихъ, экспертрихъ галаз гуьруьш тешкилдайвал я.

Слётда Дербент ва Дагъус­тандин Огни шегьерра авай вуз­ринни ссузрин студентривай иштиракиз жеда. Абуру 1-август­далди ацIурнавай анкетадин ва герек маса документрин скан-къайда (электронный жуьре) мярекатдин тешкиллувилин­ ко­ми­­тетдин электронный поч­та­дин­ ЗsIet.mol.yuzhdag@mail.ru адресдиз ракъурун герек я. Слётдин шартIар, анкета ва документрин сиягь «Кьиблепатан­ Дагъустандин жегьилрин Союз» ДРОО-дин телеграм-канал­дайни «ВКонтакте» сетда авай аккаунтда чапнава.

Слётда иштиракдайбур хкя­гъун патал тешкиллувилин комитетди экспертрикай ибарат комиссия арадал гъида ва ада, анкетайра къейднавай делилар фикирда кьуна, иштиракчийрин­ сиягь туькIуьрда. И сиягьда гьат­­дайбурухъ галаз слётдин теш­­киллувилин комитетдин чле­­нар алакъадиз экъечIда.

Агьмед  Магьмудов