Эхиримжи са шумуд юкъуз зал, сотовый телефонрай “Тади куьмекдиз” зенгер ийиз жезвач лугьуз, шикаятзавай са шумуд кас гьалтна. И месэладиз талукь малумат чаз РД-дин здравоохраненидин сайтдай жагъана. “Тади куьмекдиз” шегьердин телефонрай, гьа виликдай хьиз, — “03”, сотовый телефонрайни (пулсуздаказ) “103” нумрайриз зенг ийиз жеда. Идалайни гъейри, алава  нумраярни  кардик  ква.  Ингье  абур: 8 (8722) 51-59-11,  8 (8722) 63-63-03, 8 (8722) 55-87-69.

Ихьтин са кардал мадни фикир желб ийиз кIанзава: “Тади куьмекдиз” зенг авур вахтунда­ фельдшердин (диспетчердин) вири суал­риз дуьм-дуьз жавабар гун лазим я. Духтуррин куь­мек вучиз герек хьанватIа, азарлу ва я хасаратвал хьанвай касдин фамилия, тIвар, бубадин тIвар, яшар, а касдин адрес (район, куьче, кIвалин ва квартирадин нумраяр, мертеба, подъезддин нумра ва аниз гьахьун патал код) лугьунихъ, гьакIни, а чка фад чир жедайвал, патарив гвай машгьур чкайрин тIварар кьунихъ важиблувал ава. Эгер зенг авур касди вири суалриз жавабар ганватIа, фельдшерди эверун кьабулнавайдакай хабар гуда, куьне ганвай адрес ва амай малуматар тикрарда.

Сайтда гъанвай делилрал асаслу яз, алатай гьафтеда Махачкъаладин “Тади куьмекдин” станциядиз 5600-дав агакьна зенгер атана. Абурун чIехи пай жуьреба-жуьре азаррихъ (гьа гьисабдай яз 23%-ОРВИ-рихъ) галаз алакъалу тир. Мусибатрин медицинадин центрадин бригадаяр лагьайтIа, 46 сеферда аварияр хьайи чкайрал фена. Духтурри 73 касдиз чкайрал сифте куьмек гана. Жуьреба-жуьре хирерни кьацIар хьанвай 48 кас медицинадин идарайриз агакьарна, амайбурузни куьмекна. Аварияр хьайи чкайрал куьмек 20 декьикьада агакьнавай.

Телефондин нумра дегиш хьанва

Дагъустандин здравоохраненидин министерстводин сайтда хабар ганвайвал,  и ведомст­водин дарманралди таъминардай отделдин харжияр тIимиларуникди кьиле тухузвай кIва­лахдихъ галаз алакъалу яз “тадиз хабар гудай линиядин” телефондин нумра дегиш хьанва. Министерстводин официальный сайтда виликдай 8 (8722) 67-90-60 нумра къалурнавай. Гила лагьайтIа, дарманралди таъминарунихъ галаз алакъалу месэлайрикай “тадиз хабар гудай линиядин” телефондин 8 (8722) 68-31-56  нумрадиз зенгна хабар кьаз жеда.

Министерстводин пешекарри соцпакетдикай отказуникай гьикьван зарар аватIа,  федеральный законодательстводин къайдайрин, кьезилвилер аваз дарманралди таъминарун хъсан тирвилин, дарманар къачуникай отказна, пул къачун квелди хаталу ятIа гъавурда твада.

“Тадиз хабар гудай линияди” кIвалахдин йикъара пакаман сятдин 10-далай нянин сятдин 5-далди (перерыв сятдин 13-далай 14-далди) кIвалахзава.

Гьазурайди — Рагнеда Рамалданова