Дагъустандин здравоохраненидин министерстводин сайтда хабар ганвайвал, и йикъара республикадин ортопедиядинни травматологиядин центрада (РОТЦ), хурун кIарабдин хайи чкаяр сагъарун патал цIийи къайдадикай менфят къачуналди, азарлу сагъарнава. И жуьредин операция авур сад лагьай кас 80 йисан яшара авай махачкъалави тир. Итим машиндик акатнавай. Адал гзаф хирер-кьацIар хьанвай. Ханвай пакун тIвалари жигеррин эрчIи патаз гзаф тади гузвай. Нефес къачуз жезвачир. Тади гьалда операция авуна. Духтурри хасаратвал хьанвайдан хурун клеткадин винелай ракьун каркас эцигна ва адан куьмекдалди ханвай пакун тIвалар хкажна.
“Машиндик акатнавай итим лап четин гьалда авай. Адан кIвачеризни гъилериз, кьилин ва хурун кIарабриз какахьай жуьредин тIарвилерни хасаратвилер ганвай. Итимдиз тIарвал тежедай серенжемар (шокдиз акси) кьабулайдалай кьулухъ хурун клеткадин хъуьтуьл чкайрай симер (спицы) туналди ханвай пакун тIвалар хкажна. Ида жигерриз нефес чIугвадай мумкинвал гана, — суьгьбетна РОТЦ-дин какахьай жуьредин тIарвилеринни хасаратвилерин отделенидин заведующий Станислав Облова.
РОТЦ-дин кьилин духтур Марат Къадиеван гафарай, инсандин са шумуд пакун тIвал хуникди (аварияр хьайила, кьакьан чкадилай аватуникди ва икI мад) арадал къвезвай тIарвилиз чара акун гзаф важиблу месэлайрикай сад я. ЦIийи къайда РОТЦ-дин духтурди кардик кутунва, адахъ патент ава. Гила и къайдадал винел паталай тIарамардай аппарат алава хъувуна, менфят къачудайвал я.
— Хасаратвал хьанвай касдин жигерар операция авурдалай кьулухъ ачух хъхьана, абуру нефес къачуна. Аппарат эцигнамазди, адан гьал акваз-акваз хъсан жез башламишна. Операция ийидалди ам дамарра ивидин гьерекат агъузардай дарманрал алайтIа, жигеррин кIвалах къайдадик акатнамазди, абур акъвазарна. Сятни зуралай итим вич-вичел хтана, — алава хъувуна М.Къадиева.
Мадни малум хьайивал, аппарат эцигун патал 15 декьикьа лазим къвезва. Хасаратвал хьанвай касдин кIарабар сад-садак кукIун хъувурла, ам алудзава. Духтурри къейдзавайвал, винелай тIарамарна эцигзавай жуьреба-жуьре аппаратрикай амай клиникайрани менфят къачузва, амма винидихъ лагьанвай жуьре сад лагьай сеферда ишлемишнава. Мукьвал вахтара и къайдадикай гегьеншдаказ менфят къачун планрик ква.
Гьазурайди — Рагнеда Рамалданова
