23-декабрдиз Махачкъалада, РАН-дин Дагъустандин ахтармишунрин федеральный центрадин ЦIадаса Гьамзатан тIварцIихъ галай чIалан, эдебиятдин ва искусстводин институтда, лезги чIалан орфографиядин комиссиядин сад лагьай заседание кьиле фена. Мярекатда РД-дин Гьукуматдин Председателдин заместитель, филологиядин илимрин кандидат Нариман Абдулмуталибова, тIвар кьунвай институтдин илимдин кьилин къуллугъчи, алим Саимат Юзбеговади, филологиядин илимрин доктор Фейзудин Нагъиева, «Лезги газетдин» кьилин редактор Мегьамед Ибрагьимова, адан заместитель Куругъли Ферзалиева, ДГПУ-дин Дагъустандин филологиядин факультетдин кафедрадин доцент Владимир Бабаева, Тахо-Годидин тIварцIихъ галай институтдин илимдин къуллугъчи Жаклина Мейлановади, «Вахтар ва инсанар» передача кьиле тухузвай журналист, шаир Владик Батманова ва масабуру иштиракна.
Заседание Нариман Абдулмуталибова ачухна ва ада чIалан пешекарар комиссиядин вилик акъвазнавай асул месэладихъ галаз танишарна: 1998-йисуз акъатай «Лезги чIалан орфографиядин къайдайрин своддик» (туькIуьрайди — У.А. Мейланова) кухтадай дегишвилер аватIа, хъийидай алаваяр аватIа, гьарда вичин фикирар малумарун ва абур делилламишун.
Заседанидин иштиракчийри комиссиядик чIалахъ галаз алакъалу месэлайрал машгъул жезвай са жерге пешекарар кухтадай къарарни кьабулна. Абурун арада Дагъустандин халкьдин шаир Майрудин Бабаханов, «Самур» журналдин редактор Абдуселим Исмаилов, Дагъустандин халкьдин шаир Арбен Къардаш, филологиядин илимрин кандидат Азиз Мирзебегов, Азербайжанда акъатзавай «Самур» газетдин кьилин редактор Седакъет Керимова, «КцIар» газетдин кьилин редактор Видади Севзиханов ва масабур ава.
Комиссиядик акатнавай пешекаррал и йикъара 1998-йисуз акъатай «Лезги чIалан орфографиядин къайдайрин свод» агакьарда ва абуру чпихъ авай теклифар, меслятар, кухтадай алаваяр, дегишвилер 15-январдалди гьазурун лазим я. Январдин эхирра комиссиядин кьвед лагьай заседание кьиле фида ва пешекарри гудай теклифар фикирда кьуна цIийи хъийидай свод тамамдиз кьабулна акьалтIардалди «Лезги газетда» чапдайвал я. Прессада раижайдалай кьулухъ своддин цIийи хъувунвай вариантдикай кIелдайбуруз чпин фикирар лугьудай, теклифар агакьардай мумкинвал жеда.
Саимат Юзбеговади заседанида иштиракай пешекарривай вилик акъвазнавай месэладив жавабдарвилелди эгечIун тIалабна, гьикI лагьайтIа, орфографиядин своддихъ чIал хуьнин, вилик финин жигьетдай еке метлеб ава.
Чи мухбир
