Герек программа

Дяведин махсус серенжемдин ветеран, региондин жемиятдин «Память гор» организациядин председатель Махач Шамилова  СВО-дин иштиракчийриз ва абурун хизан­риз куьмек гун патал кардик кутунвай республикадин «Дагъларин гьунарлувал» программадихъ республика патал еке метлеб авайди къейдна.

— И программа уьмуьрдин истемишун, игьтияж я, — лагьана ада. — Федеральный «Игитрин вахт» проект давамарунин фикир аваз арадал гъайи программа тешкиллувилелди кьилиз акъудзава. Республикади маса регионрилай вилик и месэла фикирдиз къачуна ва СВО-дин иштиракчийриз, ветеранриз герек куьмек гун патал еке кIвалах ийизва. Са рахунни алач, «Дагъларин гьунарлувал» программа кьабулуник ва ам уьмуьрдиз кечирмишуник Дагъустандин Кьил Сергей Меликова кутазвай пай чIехиди я.

Программадин иштиракчийривай еке ва кIеви истемишунар ийизватIани, проектда иштиракиз кIанзавай жегьилрин кьадар югъ-къандавай артух жезва. Гьеле 1500 касди сифте паюна чпин алакьунар къалурна. Им, Россиядин маса регионрив гекъигайла, еке рекъем я. Гьелбетда, вири­ кьвед лагьай паюниз акъатначтIани, абуруз са жуьредин тежриба хьана ва абурухъ кьулухъ чIугвадай хиялни авач. Жегьилар республика патал кIвалахиз, экономика вилик тухуз гьазур я ва Дагъус­тан мадни абад ийидай кIвалах тешкилунин къас­тарив ацIанва. Программади вичин кIвалах давамарзава.

Шабагьар вахкана

Дяведин махсус серенжемда Дербент райондай хейлин кьегьалри иштиракзава. Идан гьакъиндай государстводин шабагьар агакьнавай офицеррин, аскеррин къуллугъди шагьидвалзава. И йикъара районэгьлийрив шад хабар агакьна. Агъа Жалгъандай тир подполковник Хантемир Султановаз Россиядин Игит лагьай тIвар гана.

Гьайиф хьи, дяведин серенжемда телефвилерни жезва. И йикъара райондин администрациядин кьил Мавсум­ Рагьимова дяведин махсус серенжемда телеф хьайи аскеррин хизанриз башсагълугъвал гана ва абурув государстводин­ шабагьар вахкана. РФ-дин Президентдин указдалди «Жуьр­этлувиляй» ордендалди агъадихъ галай ксар къейднавай:  eфрейторар Мушвиг Гьамзаев (Митаги-Къазмаяр), Омар Алиев (Нуьгди), старший сержант Тебрик Алибегов (Рукель), младший сержант Асланхан Асланов (Жемикент), ефрейтор Нияз Исрафилов (Мичурино), младший сержант Исмаил Муртазалиев (Белиж), Автандил Жалилов (Сабнова), Сагид Алиев (Хазар).

Ван агакьна

Мегьарамдхуьруьн райондин администрациядин кьилин везифаяр вахтуналди тамамарзавай Нариман Эфендиева дяведин махсус серенжемдин иштиракчийрин диде-бубаяр кьабулна. Аскерри администрациядиз чпин дердияр туькIуьрун патал къадалай виниз арзаяр вуганвай.

Нариман Эфендиева агьалияр кьабулунин серенжемда райондин администрациядин жавабдар работникри, газдин, электросетрин къуллугърин векилри ва маса идарайрин къуллугъчийри иштиракна.

Аскеррин ва абурун диде-бубайрин арзаяр чилин учас­то­кар чара авунихъ, талукь документар гьазурунихъ, электроэнергиядалди, газдалди, хъвадай ва дигидай целди таъминарунихъ, рекьер къайдадик кутунихъ галаз алакъалубур тир.

— Зав куь дердийрин ван агакьна, — лагьана Н. Эфендиева. — Инанмиш хьухь, чна гьар са месэладай кьил акъудда ва закондин бинедаллаз вири месэлаяр гьялдай мумкинвилер жагъурда. Важиблуди ам я хьи, гьукумдин органрихъ галаз дяведин махсус серенжемдин иштиракчийрин ва абурун хизанрин алакъа хьана кIанда. Абур чпин дердияр гваз кьилди амукьдайвал авун лазим туш. Ватандин итижар хуьзвай ксариз вири рекьерай куьмек гун чи буржи я.

Са шумуд арзада къейднавай месэлаяр гъиле-гъил аваз чкадал гьялна. Амайбурун гьакъиндай Н. Эфендиева талукь идарайриз, управленийриз герек тапшуругъар гана ва абур кьилиз акъудун лазим тир вахтарни тайинарна.

Чилин участокар чара авунин месэладин гьакъиндайни инсанар гъавурда туна. Закондин бинедаллаз чилин учас­токар чара ийизва: дяведин махсус серенжемдин иштирак­чийриз; гуьгьуьллу формированийра къуллугъ авун патал икьрар кутIуннавайбуруз; Росгвардиядин виликан къуллугъ­чийриз ва алай вахтунда кьушунра авайбуруз. Чилин учас­ток дяведин махсус серенжемда къуллугъ куьтягьна хтанвай иштиракчидизни гузва.

Абад Азадов