Ахцегь райондин Смугъулрин хуьруьн тарихда 2025-йисан 7-ноябрь халкьдин яшайиш патал кьетIен вакъиадинди яз амукьда: и йикъалай смугъулвийриз тIебии газ ишлемишдай мумкинвал хьанва. Эхь, гьуьрметунин лишан яз, эвелимжи нубатда ина СВО-дин иштиракчи Амир Гьамзаеван диде-бубадин кIвал газдик кутуна. Ахпа яваш-яваш хуьруьн амай вири кIвалеривни газ агакьда. Кьилинди, хуьре газдин турбайрин къурулуш гьазур я.
И вакъиадиз талукь яз, Вагиф Гьамзаеван кIвалин патав шадвилин митинг хьана. Ана, хуьруьнэгьлийрилай гъейри, багьа мугьманрини иштиракна:
РД-дин энергетикадин ва тарифрин министр Марат Шихалиева, хуьруьн майишатдин ва недай суьрсетдин министрдин заместитель Зураб Куччаева, «Газпром межрегионгаз Махачкала» ООО-дин генеральный директор Ризван Мурадова, адан заместитель Шамсудин Алиева, Газпромдин «Самурское» филиалдин директор Сергей Хаметова, ООО «Газпром газораспределение Дагестан» карханадин Ахцегь ва Докъузпара районрин РЭС-дин начальник Малик Эфендиева, районрин арада абонентрин къуллугъдин начальниквилин везифаяр тамамарзавай Расул Нудиралиева ва масабуру.
КIватI хьанвайбур тебрикуналди ва Смугъулрин хуьр газламишунин важиблувал къейд авуналди, мярекат Ахцегь райондин собранидин председатель Гьажимурад Парпачева ачухна. Сифте гаф ада Ризван Мурадоваз гана.
— Гьуьрметлу смугъулвияр, юлдашар! ТIебии газ ишлемишуна виридалайни асант, экологиядин жигьетдай михьи ва гьа са вахтунда энергиядин амай жуьрейрилай ужуз кудай шей я. Ам чна гьар йикъан яшайишда — тIуьн-хъун гьазурунин, хъуьтIуьз кIвалер чими авунин, чими целди таъминарунин ва гьар жуьре маса игьтияжра ишлемишзава. Гила квевай дагъдин хуьруьн мишекъат шартIарани пичера купIарин, кIарасдин, цIивиндин эвезда газ куз, кIвалера къулайвални михьивал таъминариз жеда. Мубаракрай! Анжах адан хаталувални екеди я. Хатасузвал хуьнин къайдайрал амал тавуртIа, ада инсандин кьилел еке балаярни гъун мумкин я. Гьавиляй газ ишлемишуна акьалтIай игьтиятлувал, мукъаятлувал хвена кIанда.
— Алай вахтунда чна Смугъулрин хуьруьн жемят — 120 кIвал — тIебии газдин къурулушдик кутазватIа (герек вири документация гьазурунин кардани квез чи пешекарри куьмекда), къведай йисалай чун и дередин амай вири хуьрерни газламишунив эгечIда, — лагьана Мурад Усмановича.
— Къенин кьетIен вакъиа гзаф инсанрин саналди тир гьакъисагъ зегьметдин нетижа я. Инал заз «Ахцегь район» муниципалитетдин кьил Абдул-Керим Палчаеваз, газопроводдин заказчикринни пудратчийрин коллективриз сагърай лугьуз кIанзава. Амма важиблуди анжах газопроводни хуьруьн къенепатан къурулуш туькIуьрун туш. Дагъдин атIугъай шартIара жемят датIана ерилу газдалди таъминарна кIанзава. Гьа са вахтунда, гьамиша мукъаят яз, хатасузвал хуьнизни фикир гун важиблу я. И месэладал чна кьетIен гуьзчивал тухуда, — къейдна Шамсудин Алиева.
Нубатдин гаф Малик Эфендиева къачуна. Ада Дагъустандин Газпромдин ва газ кутазвай кIвалин иесидин арада авай икьрардин сергьятра аваз, кIвале газ ишлемишиз гьазурвилин акт авайди ва технологиядин вири куьлуь-шуьлуьярни вилив хвенвайди малумаруналди, Вагиф Гьамзаеван кIвалин пичинин тадаракар тIебии газдик кутуна. Ихьтин еке шадвиляй кIвалин иесиди мугьманар къунагъламишна. ИкI, хуьруьн сифте кIвал газламишунин мярекат смугъулвийри суварин къайдада къейдна.
Дашдемир Шерифалиев
