Россиядин армиядиз жегьилар тухун давам жезва. И йикъара республикадин са шумуд районди шад гьалара, диде-бубайрин, дяведин, зегьметдин ветеранрин, чкайрин муниципалитетрин векилрин, военкоматрин иштираквал аваз рухваяр армиядин жергейриз рекье туна.
СтIал Сулейманан райондай гьеле кьве десте жегьилри аскервилин партал алукIна, санлай къачурла, 25 касди. Абур рекье тваз диде-бубаяр, дустар, райондин депутатар, женгерин гьерекатрин ветеранар кIватI хьанвай чкадал райондин муниципалитетдин кьил Саид Темирханова жегьилрив военный билетар вугун тебрикна ва абурун тIварцIихъ хуш гафар лагьана.
— Куьне чи баркаллу адетар давамарзава ва гьавиляй чна квел дамахзава, — лагьана С. Темирханова. — Къе инал кIватI хьанвайбурун фикир сад я: Ватандиз намуслувилелди, уьтквемвилелди къуллугъна, буржи лайихлувилелди тамамарна, диде-бубайрин патав сагъдиз хтун. Инанмиш я, куьне армиядин жергейра садан гафни текъведайвал къуллугъда ва лазим вахтунда кьегьалвални къалурда. Чир хьухь хьи, чун квез ва диде-бубайриз герек куьмек гуз гьамиша гьазур я.
Аскервилиз физвайбуруз руьгь хкаждай гафар «Сифтебурун гьерекатдин» векил Замир Набиева, жегьил шаир Муслим Идрисова, хуьрерин администрацийрин кьилери лагьана.
Райондин администрациядин кьилин заместитель Абуталиб Фатулаева жегьилриз къуллугъдин вахтунда герек къведай насигьатар гана. Жегьилрив военный билетар вугунихъ галаз сад хьиз, мергьяматлувилин «Умуд» фондунин патай абуруз пулдин пишкешарни гана.
* * *
Уьлкведин жегьил агьалийриз армиядиз эвер гунин къайдадик дегишвилер кухтадайвал я. РФ-дин Госдумадин оборонадин рекьяй комитетди теклифнавай законопроект депутатри сес гуналди кьабулнава. Адан кьилин макьсад ам я хьи, жегьилриз йисан вири вахтунда армиядиз эвер гуда. Яни яш тамам хьанвай жегьилриз йисан вири вахтунда военкоматдин комиссийриз теклифда, абурун сагъламвилин гьал тайинарда, нихъ гьихьтин пеше аватIа, ни гьихьтин вуз, ссуз куьтягьнаватIа чирда, психологиядин рекьяй къуллугъ авуниз кутугнавани, авачни тайинарда.
Закондин проектда къалурнавайвал, армияда къуллугъ авун патал агьалияр йиса кьве сеферда (1-апрелдилай 15-июндалди ва 1-октябрдилай 31-декабрдалди) рекье твада.
Маса цIийивилерикай рахайтIа, хуьрера чуьлдин кIвалахрал машгъул агьалийриз анжах 15-октябрдилай 31-декабрдалди, образованидин идарайра кIвалахзавай жегьил педагогриз 1-майдилай 15-июлдалди, яргъал тир Кеферпатан агьалийриз 1-майдилай 15-июлдалди ва 1-ноябрдилай 31-декабрдалди армиядин жергейриз эверда.
Закондин проектдик ихьтин цIийивални ква. Электронный повестка атанвайди 30 йикъан муьгьлетда военкоматдиз атун герек я. Ида призывдин комиссиядиз отсрочка гудай, къуллугъ авуникай михьиз азаддай ва маса жуьреда къуллугъдай къарар кьабулдай мумкинвал гуда.
Россиядин Президентди закондин проектдал къул чIугуртIа, ам 2026-йисан 1-январдилай къуватда гьатда.
Абад Азадов
