Сулейман-Стальский районда кардик квай агьалийриз яшайишдин рекьяй къуллугъзавай комплексный центр (КЦСОН) ва тежрибалу ашпаз Зирифа Абдулгьалимовади кIвалахзавай столовай Кьасумхуьрел сад-садан патав гва.
И центрадиз тIимил таъмин хизанрай тир, чпихъ гелкъуьн кIанзавай аялар гъизва, абурухъ галаз логопедди, медсестради, массажистди, юристди ва маса пешекарри кIвалах тухузва, гьакIни аялриз тIуьн гун тешкилнава. И кIвалахра центрадин пешекарриз рикI михьи, гъил ачух инсанрини чпелай алакьдай куьмекар гузва. ИкI, и йикъара ашпаз Зирифа Абдулгьалимовади центрадиз хуьрерай тIимил таъмин тир 10 хизандай гъанвай аялриз вичин патай пулсуздаказ тIуьнар ва ширинлухар авай пакетар гана.
— КЦСОН-диз гъизвай аялриз Зирифа Гьажикеримовнади вичин патай тIуьнар, пишкешар гуз им сад лагьай сефер туш, — лугьузва анин яш тамам тахьанвайбурун реабилитациядин отделенидин заведующий Заира Азизовади. — Ихьтин мергьяматлу ва баркаллу кIвалахдай чна ва аялрин диде-бубайри адаз чухсагъул лугьузва.
Пешедал рикI алай, кIвалахдин гзаф йисарин тежриба авай ашпаз хьиз, З.Абдулгьалимова гъил ачух инсанни я. Чун шагьид хьайивал, Кьасумхуьрел Ленинан куьчедин къерехдай тротуар тухузвай устIарризни З.Абдулгьалимовади вичин патай кьве юкъуз пулсуздаказ тIуьнар ганай.
Зирифа Гьажикеримовна хьтин мергьяматлу, сувабдин крар ийизвай инсанриз аферин, баркалла!
Хазран Кьасумов
