2025-йисан ноябрдин делилралди, Дагъустанда йисан инфляция 6,58 процентдал кьван агъуз хьанва (октябрдиз — 7,71%), им лагьайтIа, Кеферпатан Кавказдин федеральный округдик акатзавай маса регионра авай кьадардилай гзаф (6,42%), гьа са вахтунда санлай къачурла уьлкведа авай кьадардилай тIимил (6,64%) я, хабар гузва Россиядин Банкдин Кьиблепатан регионда авай ГУ-ди.
Малум хьайивал, ноябрдиз недай суьрсетдин къиметар виниз финин гьерекат са тIимил кьван яваш хьанва. Амма нисидин къимет республикада къвердавай хкаж хьун давам жезва. Зул алукьунихъ галаз сад хьиз, адет тирвал, калерикай ацазвай некIедин кьадар тIимил хьуни республикада гьазурзавай нисияр патал лазим хаммалдин кьадар тIимил хьунал гъана. Идалайни гъейри, нисидин къиметар багьа хьуниз маса регионрай тир таъминчийри рекьериз ийизвай харжияр гзаф хьуни таъсирна. Санлай къачурла, са йисан вахтунда республикада ниси 12,56 процентдин багьа хьанва.
Гьа са вахтунда шекердин къимет агъуз аватиз им ирид лагьай варз я. И кардиз къенепатан санлай къачур базарда суьрсетдин запасар екебур хьун себеб яз, къиметар агъуз хьуни таъсирна. Шекер квай чугъундуррин бегьер винизди хьунин нетижада гьасилзавай шекердин кьадар гзаф ва кура-кура маса гудай базарриз гузвай басрух тIимил хьана. Санлай къачурла, 12 вацран вахтунда шекердин къимет 4,68 процентдин агъуз аватна.
ЯкIун суьрсетдин къиметарни агъуз хьанва. Республикада гьасилзавай якIун кьадар гзаф хьанва, ида лагьайтIа, базарда теклифзавай метягьдин кьадар гзафардай мумкинвал гана. Йисан вахтунда якIун суьрсет, санлай къачурла, анжах 3,97 процентдин багьа хьанва. Санлай уьлкведин мулкунал лагьайтIа, Росстатдин делилралди, йисан сифте кьилелай малдин якIун къиметар 13,3 процентдин багьа хьанва.
Амина Муслимова
