РД-дин хуьруьн майишатдин хилен зегьметчийри алай йисуз тахминан 4 агъзур тонндив агакьна ракъинин цуькверин бегьер кIватIна. 2024-йисан делилрив гекъигайла, бегьердин кьадар 10,3 процентдин гзаф хьанва.
Лагьана кIанда, ракъинин цуьквер чIехи майданра авай республикадин ругуд районда гьасилзава. И набататди кьунвай мулкарин умуми майданар алай йисуз 3 агъзур гектардив агакьдалди гегьенш хьанва. Юкьван бегьерлувал са гектардай 13,1 центнердиз барабар яз, набатат цанвай вири мулкунилай кIватIнавай бегьердин умуми кьадар (валовый сбор) 3,97 агъзур тонндиз барабар я. КIватIнавай ракъинин цуькверин бегьердин кьадардиз килигайла, виридалайни вилик чкадал Хасавюрт район ала — 3,5 агъзур тонндилай гзаф. Гьа са вахтунда виридалайни виниз тир бегьерлувилив Къизляр (19,6 ц/га) ва Гуниб (19 ц/га ) районрин лежберар агакьнава. РикIел хкин, алатай йисуз республикада санлай къачурла 3,6 агъзур тонндиз барабар ракъинин цуькверин бегьер вахчунай.
Кеферпатан Кавказдин федеральный округдик акатзавай маса регионрани ракъинин цуькверин бегьер виниз хьанва — санлай къачурла, 9 процентдин. Росстатди хабар гузвайвай, бегьердин кьудакай пуд пай (370 тонн) Ставрополдин крайдал гьалтзава.
Ж. Саидова
