Чи ватанэгьлияр — гьар сана
И сеферда заз кIелзавайбур Самара шегьерда яшамиш жезвай чи жегьил ватанэгьли, еке алакьунар авай художник-дизайнер Фуад Шагьбалаевич Саидагьмедовахъ галаз танишариз кIанзава.
Ам 1982-йисуз Азербайжандин КцIар шегьерда яратмишунардай интеллигенциядин хизанда дидедиз хьана. 1992-1996-йисара шегьердин художественный мектеб куьтягьна. Бажарагълу жегьил вичин рикI алай кардин сирерай мадни хъсандиз кьил акъудун патал Самара шегьердин К.Петров-Водкинан тIварунихъ галай художественный училищедик экечIна. 2003-2007-йисара ана чирвилер артухарайдалай кьулухъ ада региондин, областрин хейлин выставкайра иштиракна. 2013 ва 2016-йисара ада вичин яратмишунриз талукь хсуси выставкаярни тешкилна. Реализмдинни импрессионизмдин къайдада яратмишзавай Фуадан суьретар Россиядани, къецепатан уьлквейрани хсуси коллекцийра ава.
Фуадан аял вахтар КцIара акъатна. Архитектор тир бубади гъвечIи чIавалай вичин рухвайриз яратмишунар, искусство кIанарна. Художникдин ватан элкъуьрна кьунвай тIебиат гзаф гуьрчегди, ажайибди я. Белки, Фуадан бажарагъдизни гьа и тIебиатди таъсирна жеди. Идан гьакъиндай Фуадан суьретри шагьидвалзава.
Гьелбетда, кьетIен алакьунар авай гьар са аялдик гъвечIи чIавалай гьевес кутадай, адахъ вичин рикI алай кардай чирвилер гудай муаллим хьунални кар ала. Ф. Саидагьмедова мектебда суьретар чIугваз чирай муаллим Севиля Гаибовнадин тIвар еке разивилелди кьазва.
“Яратмишунрин рекье гъвечIи чIавуз хъсан муаллим хьуникди зи бахтуни гъана. Муаллимди зак еке илгьам кутаз хьана, ада мектебда зи выставкаярни тешкилдай”, — мектебдин йисар рикIел хкизва суьретчиди.
Гуьгъуьнлай Фуад КцIар шегьердай тир художник Рустам Нагъиевахъ галаз таниш хьана. Аскервилин къуллугъ тамамарна хтайдалай кьулухъ жегьилди, суьретчи Р. Нагъиеван устIарханадиз физ, вичин чирвилер, тежриба мадни артухариз хьана.
Самара шегьердиз кьисметди ам 2003-йисуз акъудна.
Художникдин уьмуьр ва яратмишунар тIебиатдихъ галаз сих алакъада ава. Самарадани адаз Волга вацIу ва Жигулевский дагълари илгьам гана. Фуадан яратмишунра урусрин зурба художник И.Левитана кьетIен гел туна. Ада кIелдай йисара Левитанан кIвалахрай суьретар арадал гъана.
Фуадан яратмишунрихъ галаз интернетда таниш жедай мумкинвал ава. Алай вахтунда ада вичин уьмуьрдин юлдашдихъ галаз санал кьве хциз тербия гузва. Бажарагълу ватанэгьлидихъ къуй сагъвал ва яратмишунра еке агалкьунар хьурай!
«Лезги газет»
