17-майдиз Дербентда, Лезги театрдин дараматда, Дагъустандин халкьдин шаир СтIал Сулейманаз бахшнавай мярекат кьиле фена. “Сулейманаз мугьманвиле” лишандик кваз тешкилнавай и мярекатда Дербентдин, Кьиблепатан Дагъустандин са жерге районрин мектебрин муаллимри, анра кIелзавай аялри ва масабуру иштиракна.
Мугьманар Лезги театрдин директор Динара Эминовадини кьилин режиссер Казбек Думаева тебрикна. СтIал Сулейманан къаматда аваз сегьнедал экъечIай Урусатдин лайихлу артист Абдуллагь Гьабибова чIехи шаирдин шиирар кIелна, Дагъустандин халкьдин артистка Фаризат Зейналовади шаирдин чIалариз кхьенвай манияр тамамарна.
Къейд ийин хьи, мярекат Лезги театрдин коллективди Дербентдин образованидин управленидихъ ва Гьажи Давудан тIварунихъ галай руьгьдинни марифатдин центрадихъ галаз санал тешкилнавай.
Чи мухбир
