14-майдиз Докъузпара райондин Къурушдал ДАССР-дин 100 йисан юбилейдин сергьятра аваз, Сив хуьнин сувариз ва Нажмудин Самурскийдиз бахшна, спортдин акъажунар кьиле фена. Идакай чаз райондин муниципалитетдин пресс-къуллугъди хабар гана.
Спортдин суварик Дербентдай, Махачкъаладай, Ярагъ-Къазмайрилай, Къуйсундилай, Усугъчайдай, Ахцегьай тир 100-далай виниз ксари иштиракна. Акъажунрин программадик дагъдиз чукурун, кроссдин чукурун, штанга гваз упражненияр, чене акъудун ва спортдин милли маса жуьреяр квай. Ана школадиз тефенвай ва школайра кIелзавай аялрини, чIехибуруни иштиракна. Акъажунрин спонсорар райондин администрация ва хуьруьн 20-далай виниз хизанар тир. Тешкиллувилин ва спонсорвилин рекьерай куьмекар гайибурун жергеда Ф.Къулиев, Б.Гьажиев, К.Эфендиев, Д.Асваров ва гзаф масабур (виридан тIварар кьазвач) ава. Аферин виридаз!
Спортдин милли ва олимпиададинбур тушир жуьрейрай дагълух Къурушдал акъажунар 4-сеферда кьиле тухванва. Иштиракчийрин кьадар ва география йисалай-суз гегьенш жезва.
Чи мухбир
