Дагъустанда Украинада кьиле физвай махсус серенжемдин иштиракчияр патал реабилитациядин центр эцигдайвал я. РД-дин Кьилин пресс-къуллугъди хабар гузвайвал, 17-январдиз и месэладин патахъай Сергей Меликов Москвада РФ-дин оборонадин министрдин заместитель, «Защитники Отечества» фондунин председатель Анна Цивилевадихъ ва РФ-дин оборонадин министрдин заместитель Павел Фрадковахъ галаз гуьруьшмиш хьана.
Сергей Меликова хабар гайивал, объект эцигун патал герек къвезвай пулдин такьатар чи ватанэгьли, машгьур меценат Сулейман Керимова чара ийида. ГьакIни республика патал еке метлеб авай и проект кьилиз акъудунин карда РФ-дин оборонадин министерстводини, «Защитники Отечества» фондунини куьмекар гуда.
«Чи кьегьал ватанэгьлийри Ватандин хатасузвал хуьнин рекье акьалтIай викIегьвилер къалурзава. Абур гьам сагъламвилин, гьамни руьгьдин жигьетдай мягькем хъхьун патал абуруз къулай шартIарни жедайвал авун чи умуми буржи я», — лагьана Дагъустандин Кьили.
Къейд ийин хьи, центр эцигиз эгечIун патал С. Меликова республикадин гьукумдин талукь органриз тапшуругъар ганва.
Чи мухбир
