Алатай йисуз РД-дин Кьил Сергей Меликован Указдалди СтIал Сулейманан тIварцIихъ галай Дагъустандин гьукуматдин эдебиятдин премия кардик кухтуна.
РикIел хкин, чIехи шаирдин тIварцIихъ галай премия арадал хкунин теклиф 2023-йисан 19-декабрдиз Махачкъалада кьиле фейи Дагъустандин писателрин умуми собранидал «Лезги газетдин» кьилин редактор Мегьамед Ибрагьимова ганай. Мярекатдин иштиракчийри вирида и теклифдин тереф хвенай ва, Дагъустандин писателрин союзди герек тир чарар-цIарар гьазурна, республикадин кьилевайбурал агакьарнай.
Чна виликдайни хабар гайивал, СтIал Сулейманан тIварцIихъ галай премия кьве йисалай са сеферда кьве номинациядай (жуьт тушир йисара) гузва: Дагъустандин милли чIаларал кхьенвай шииратдин ва я гьикаятдин хъсан эсердай ва Дагъустандин милли чIаларал шииратдин ва я гьикаятдин эсер хъсан таржума авунай. Премиядин лауреатриз дипломни 150 агъзур манатдин кьадарда авай пулдин пишкеш гузва.
2025-йисуз чIехи шаирдин тIварцIихъ галай премия къачун патал вад касди чпин ктабар, эсерар теклифнава:
Аминат Абдулманаповади — дарги чIалал кхьенвай кьве томдикай ибарат «Шиирар» ктаб;
Эльмира Ашурбеговади — табасаран чIалал кхьенвай шииррикай ибарат «Муьгьуьббатдин дуьаяр» ктаб;
Владик Батманова — лезги чIалал кхьенвай шииррин «Лекьрен муг» ктаб;
Арбен Къардаша — лезги чIалал кхьенвай эсеррин кьуд томдикай ибарат «Хкягъаяр» ктаб;
Евгений Чеканова — лезги чIалай урус чIалаз таржума авунвай эсеррин «Напевы Самура. Избранные переводы» ктаб.
ГьакIни 2025-йисуз Дагъустандин гьукуматдин эдебиятдин кьвед лагьай — Расул Гьамзатован тIварцIихъ галай — премия къачун патал кьве авторди чпин ктабар теклифнава. Абурун арада табасаранрин шаир Сувайнат Куьребегова ва даргийрин шаир Айша Къурбанова ава.
Агьмед Магьмудов
