ЖКУ-дин гьакъидин субсидияр туькIуь­рун патал гила “Зи Документар” (МФЦ) идарадиз фин чарасуз туш. И кар неинки МФЦ-да, гьакI онлайн жуьреда “Госкъуллугъар” порталдин куьмекдалдини кьилиз акъудиз жеда. Месэла гьялун патал “Госкъуллугъар” порталда тестикьарнавай жуван “хсуси кабинет” хьун герек я.

Яшайишдинни коммунальный къуллугърин гьакъидин субсидия вуч я? ЖКУ-диз талукь яз харжнавай такьатрин са кьадар пай государстводин бюджетдай эвез яз хгузвай пул.

Ихьтин такьатар агъадихъ къейднавай ксаривай къачуз жеда:

—  государстводин ва я муниципальный яшайишдин фондуна яшамиш жедай чка (помещение) ишлемишзавайбурувай;

—  яшамиш жедай хсуси кIвале киридин икьрардалди яшамиш жедай чка кирида къачунвайбурувай;

—  яшамиш жедай чкадин ва я яшамиш жедай чкадинни эцигунрин кооперативдин членривай;

—  яшамиш жедай чкадин (квартирадин, хсуси кIвалин, квартирадин ва я хсуси кIвалин са паюнин) хсусиятчийривай.

Тайинарзавай субсидияр 6 вацра къуватда жеда. Ругуд вацран муддат акьал­тIайла, талукь документар вахкун тикрар хъувуна кIанзава.

Справкадин чкадал — декларация

РД-дин МФЦ-дин кьилин идаради хабар гайивал, “хизандин гьакъиндай справка” Россиядин гзаф регионра документ хьиз арада амачиз са шумуд йис я. Амма Дагъустанда и справкадихъ къуват ама ва ам ишлемишни ийизва.

Хизанда авай ксарин гьакъиндай тир справка гьакъикъи адресдин кIвале вужар прописка авунватIа ва а ксарин мукьвавилин дережаяр къалурзавай чарчин выписка я. Къенин юкъуз гьам региондин, гьамни муниципальный идарайри ватандашривай и документ истемишзава. Ихтилат физвай справка агьалийриз муниципалитетри, идара ийизвай тешкилатри (управляющая компания) ва ТСЖ-ри гузва. Амма регистрациядин учетдин кIвалахда абуру иштиракзавач ва абурухъ справкада къалурзавай информация тестикьардай делилрин база авач.

Федеральный законодательстводал асаслу яз, государстводин ва муниципальный къуллугъар (услуги) кьилиз акъуддайла, хизандин гьакъиндай справка исте­мишун герек амачир кар я. Яни халкьдиз къул­лугъар ийизвай органриз, къанундал асаслу яз, ватандашривай нормативный актара къалур тавунвай документар истемишдай ихтияр авач.

Дагъустандин МФЦ-ди, экономикадин ва мулкар вилик финин министерстводи кьил кутуналди, гьукумдин органриз и справка истемишун къадагъа ийидай Да­гъустан Республикадин къанундин проект туькIуьрнава. Справкадин чкадал ватандашри чпи ацIурдай декларациядин форма кьабулнава ва тестикьарнава. Гила агьа­лиди хизанда авай ксарин кьадар вичи къалурзава ва ихьтин декларацияда  гьатдай делилрин якъинвилин патахъай жавабдарвални гьадан хиве жеда.

Гьа икI, са жерге къуллугъар (услуги) къачунин ва герек документар кIватIунин гьерекат регьят хьанва.

Хизанда яшамиш жезвай ксарин гьа­къиндай декларация бязи къуллугъар къачудайла истемишзава: яшайишдин рекьяй­ агьалияр хуьзвай идарайра, пособияр тайи­нардайла ва са жерге маса куьмекдин серенжемрикай менфят къачудайла. Ибурулайни гъейри, яшамиш жедай кIвал къачун патал госпрограммадай куьмек къа­­чудайлани, декларация герек жезва. Месела, куьгьне хьанвай кIваляй цIийибу­руз куьчаруниз талукь программада иштиракун патал; юзан тийидай эменнидин ирс­сагьиб я лагьай ихтиярар тестикьарун па­тал. Нотариусри ирс яз вахкузвай кIвале регистрация авунва лагьай делил тестикьарзавай документ истемишзава.

«Лезги газет»