7-мартдиз “Ахцегь район” муниципальный тешкилатдин  кьилин везифаяр вахтуналди тамамарзавай  Роберт Гьамзаев ва райондин ­депутатрин собранидин  предсе­датель Абдул-Керим Палчаев, “Чкайрилай теклифар” программа уьмуьрд­из кечирмишунин сергьятра аваз, бинедилай ремонт авунвай аялрин “Жегьил  космонавт”  бахчадиз мугьман хьана.

ЦIийикIа туькIуьр хъувунин нетижада  200-далай гзаф аялри чирвилер къачузвай дараматдин къецел патан цлар  керамогранитдалди агалнава, чимивал гудай, гьава михьи ийидай, михьи целди таъминардай ва чиркин ятар къакъуддай къурулушар  тамамдаказ цIийикIа туькIуьр хъувунва, гьакIни дараматдин къенепатан цларин сува­гъар, чилел вегьенвай затI цIийибу­ралди эвезнава.

Къейд ийин, и проект уьмуьрдиз кечирмишун патал 26 миллион манат чара авунва, идакай 20 миллион региондин бюджетдай я. Аялрин бахчадин неинки винел патан акунар хъсан патахъ дегиш хьанва, ина гьакIни  кIвалерин арайра авай ракIарарни  дегишарнава,  кухняни санитариядинни эпиде­мио­логиядин истемишунрив кьадайвал туькIуьрнава, аялрин гьар са дестедиз  вичин санузел хьанва ва икI мад. Роберт Гьамзаева бахчадин коллективдиз ремонтдин кIвалахар тамам хьун мубаракна:

— Къе чун хъсан шартIар арадал гъиз алакьай образованидин мад са  идарада ава. Идай  заз Да­гъустан Республикадин Кьил Сергей Алимович Меликоваз, кьиле Абдул-Керим Палчаев аваз депутатрин корпусдиз,  райондин администрациядин талукь тир къурулушриз ва и карда иштиракай амай вири юлдашриз чухсагъул лугьуз кIан­за­ва. Вири и кIвалахар чалай ан­жах саналди тир къуватралди кьи­лиз акъудиз алакьна.

Абдул-Керим Палчаева аялрин бахчадин коллективдиз акьалт­­завай несилдиз тербия гунин карда чIуг­вазвай  гьакъисагъ зегьметдай, регьимлувиляй, сабурлувиляй баркалла лагьана. Ада гьакIни аялрин бахчадиз цIийи мебель къачунин, анин патав гвай мулкар аваданламишунин, аялар къугъвадай майдан туькIуьрунин планрикайни лагьана. Ада къейд авурвал, райондин руководстводи яшайишдин хел еримлу авунин кIвалах галай-галайвал кьиле тухуда.

“Чна аялар бахтлубур, сагъламбур ва бажарагълубур яз чIехи хьун патал мумкин тир крар ийизва”, — акьалтIарна ихтилат А-К.Палчаева.

Вичин нубатдай,  образованидин идарадин коллективди  республикадин ва райондин  руководстводиз   аялрин бахча цIийикIа туькIуьр хъувунин карда къайгъударвал авунай чухсагъул лагьана.

Амина Муслимова