16-апрелдиз РД-дин Гьукуматдин Председатель Абдулмуслим Абдулмуслимова республикадин министерствойрин, ведомствойрин ва муниципалитетрин кьилерихъ галаз гьар гьафтеда тешкилзавай заседание кьиле тухвана. Иштиракчийри гьукумдин органри агьалийрин арзайриз фикир гузвай гьалариз, муниципалитетар целди таъминаруниз талукь ва са жерге маса месэлаяр веревирдна.

РД-дин Кьилин ва Гьукуматдин Администрациядин Руководителдин сад лагьай заместитель Махач Омарова хабар гайивал, алатай гьафтеда ЦУР-дин гьисабунралди, республикадин гьукумдин идарайриз 881 агьалидилай арзаяр атана. Абурун саки са пай чкайрал эквер хкатунихъ галаз алакъалубур тир, гьавиляй абур республикадин энергетикадин ва тарифрин министерстводизни «Дагэнергодиз» рекье туна. Амайбурни яшайишдин гьи хилез талукь ятIа, гьа министерствойрив агакьарна.

А.Абдулмуслимова министрривай, шегьерринни районрин кьилеривай агьалийрилай къвезвай гьар са арза вахтунда ахтармишун ва энгел тавуна гьялун тапшурмишна.

Заседанидин сергьятра аваз премьер-министрди 20-апрелдиз Дагъустанда республикадин дережада аваз субботник кьиле фидайдакай хабар гана.

«За вири министерствойрин, ведомствойрин, муниципалитетрин администрацийрин, хуьрерин кьилеривай тIалабзава: майдин вацра жезвай суварар алукьдалди куь идараяр авай мулкара, шегьерра, районра, хуьрера михьивилер ая», — лагьана А.Абдулмуслимова.

Чи  мухбир