13-апрелдин нянихъ СтIал Сулейманан районда, Кьасумхуьруьз мукьва, арадал атай аварияди вири республика къарсурна: пуд машин («Hyundai Solaris» ва кьве «Газель») сад-сада акьунин нетижада пуд кас телеф хьана.
«Hyundai Solaris» маркадин машинда кьуд кас (хизан) авай. Абурукай рулдихъ галай гада (хизандин кьил) ва 6, 7 йис хьанвай кьве аял чкадал телеф хьана, дишегьли (аялрин диде) алай вахтунда духтурханада ава. Муькуь машинра авайбурукайни 8 кас жуьреба-жуьре хирер-кьацIар алаз духтурханадиз агакьарна.
Кьиникьрал гъайи авария рекье улакьрин гьерекатдин хатасузвилиз талукь къайдайрал амал тавунин нетижада арадал атана. И жигьетдай РФ-дин Силисдин комитетдин РД-да авай Управлениди уголовный дело къарагъарнава.
«Лезги газетдиз» малум хьайивал, «Hyundai Solaris» маркадин машин гьалзавай Радмир Абдуселимовани адан уьмуьрдин юлдашди СтIал Сулейманан райондин администрациядин информациядин агентствода кIвалахзавай. Силисдин делилралди, Р.Абдуселимова улакьрин гьерекатдин къайдаяр чIурна. Ада гьалзавай машин, къарши гьерекат авай зулуз экъечIуналди, машинар сад-сада акьуна.
Гьакъикъатдани, чIехи бедбахтвал я. Абдуселимоврин хизандиз и йикъара Дагъустандин Кьил Сергей Меликова, СтIал Сулейманан райондин кьил Саид Темирханова, хейлин масабуру башсагълугъвал гана. «Лезги газетдин» редакциядин коллективдини Абдуселимоврин хизандиз, дериндай хажалат чIугунивди, башсагълугъвал гузва. Къуй Аллагьди телеф хьайибурун хизанриз, вири мукьва-кьилийриз и бедбахтвал эхдай къуватар, сабур гурай. Амин!
Рекьера жезвай аварийрин кьадардал гьалтайла, Дагъустан уьлкведин регионра сад лагьай чкадал ала. Республикадин кьилевайбуру и гьал дегишарун патал хейлин серенжемар кьабулзаватIани, аварийрин кьадар тIимил жезвач. Кьасумхуьрел бедбахтвилин дуьшуьш арадал атай юкъуз республикада мад пуд авария ва абурун нетижада 4 кас телеф хьана. Са юкъуз — 7 кьиникь. Ихьтин гьаларин вилик пад кьун патал, сифте нубатда машиндин рулдихъ ацукьзавай гьар са касди рекьера гьерекатдин къайдайрал амална кIанда. Йигинвал артухаруни, къарши гьерекат авай патаз экъечIуни квел гъизватIа, чаз виридаз аквазва.
«Лезги газет»
