Дидевилин капиталдин такьатрин гьисабдай аялдин образованидин гьакъи гуз жедани?
Дагъустандин кьилин МФЦ-дин идарадин пешекарри малумарайвал, дидевилин капиталдин такьатрин гьисабдай хизанда авай гьар са аялдин образованидин гьакъи гуз жеда. Кьилин шартI ам я хьи, дидевилин капиталдин сертификат стхадин ва я вахан кIвачихъ галайди хьун лазим я.
Къейдзавайвал, дидевилин капиталдин такьатар хсуси ва я кьабулнавай веледдиз чирвилер гунин рекье ишлемишиз жеда. ГьакIни капиталдин такьатар са шумуд аялдиз пайиз жеда.
Важиблу шартIар:
— капиталдин такьатар мектебда, вузда ва я колледжда чирвилер къачуниз серф авун патал сертификат ганвай аял хьайидалай кьулухъ пуд йис гуьзетна кIанда;
— яслидин ва я аялрин бахчадин гьакъи гун патал капиталдин такьатар сертификат къачурдалай кьулухъ гьасятда ишлемишиз жеда;
— образованидин идарада чирвилер къачуз эгечIай вахтунда веледдин яш 25 йисалай виниз тахьун шартI я.
“Форма №8”
“Форма №8” аялдихъ прописка ава лагьана тестикьарзавай шагьадатнамадиз лугьузва.
Ам ихьтин дуьшуьшра герек жеда:
— эгер аял ва адан диде-буба уьлкведин маса региондиз куьч жез хьайитIа;
— яшайишдин пособие къачун патал:
— эгер диде-бубади цIийи кIвал къачуртIа, регистрация ийидай вахтунда;
— чкадин поликлиникада медицинадин рекьяй куьмек къачудайла;
— аял бахчадиз ва я чирвилер гудай идарадиз тайинардайла;
— дидевилин капиталдин сертификат къачун чарасуз тирла;
— аялар авай диде-бубаяр чара жедайла.
“Форма №8” шагьадатнама агьалийри гзафни-гзаф МФЦ-дин идарайрай къачузва. Ам къачудайла, диде-бубадив паспортар ва аял хайивилин гьакъиндай шагьадатнама хьун герек я. Вад йикъалай документ гьазур жеда.
Гьамишалугъ яз хуьзвач
Гьар са къуллугъдин нетижада гузвай документ МФЦ-дин идарада хуьнин тайин муддат ава. А вахт куьтягь жедалди агьалиди вахчун тавуртIа, документ элкъвена талукь органдив ахгакьарзава ва я тергзава.
Гьикьван чIавалди хуьзва МФЦ-да документар?
Паспорт (цIийиди) — туькIуьрайдалай кьулухъ са вацран муддатда.
Паспорт (прописка дегишарайдалай кьулухъ) — МФЦ-див ахгакьай макъамдилай са вацран муддатда.
Хсусият регистрация авурдалай кьулухъ документар — МФЦ-див ахгакьайдалай кьулухъ са вацран муддатда.
Водителвилин шагьадатнама — МФЦ-див ахгакьайдалай кьулухъ са вацран муддатда.
«Лезги газет»
