—        Нек янавай чай, са тIимил кьел хуькуьрна, хъвайитIа, ада ратар хъсан михьи ийида. Гьавиляй ам тIуьр шейинилай зегьерламиш хьанвайлани ишлемишун меслят къалурзава.

—        КIвачер дакIунвайла, са пакетда авай кьел це цIурурда, ахпа а къаришмада дасмал­ кьежирна, юкьвал эцигна, чими шарфуналди ку­тIунда. Дасмал чими хьайила, мад кьежирна, юкьвал эцигда. Са шумуд юкъуз гьа икI авурдалай гуьгъуьниз кIвачерин дакIун алатда.­

—        Жалгъайра кпулар ва подаградин азар авайла, хуьрекдин са тIуруна авай верхи тарарин пешерал са истикан яру чехир илична, зайиф цIал 10 декьикьада ругуна, са суткада тада. Ахпа ам куьзна, йи­къа кьве сеферда, экуьнахъ ва нянихъ, тIазвай чкайривай гуьцIда. Сагъарунин таъсир гужлу хьун патал тIазвай жалгъаяр чимиз хуьн лазим я.

—        Бедендик псориаздин азар квайла, агъадихъ галай рецептди хъсан куьмек гуда: хуьрекдин са тIу­руна авай куьлуь авунвай сельдерейдин дувулрал 1,5 л ргазвай яд илична, 4 сятда хъсандиз кIе­вирна тада. Ахпа ам куьзна, йикъа 3-4 сеферда хуьрекдин са тIуруна авайди ишлемишда.

—        Сенжефил иммунитет хкажун патал гзаф хийирлу шей я. Ада гьакIни мекьивилин азаррикай хуьда, стрессар хьайи дуьшуьшра­ куьмекда, бедендик квай зарар гузвай шейэр хкудда, ратарин кIвалах хъсанарда. Ам хаму­нин, жигеррин, туьтуьнин хтунин, цIу­ма­руф­дин азарар патални гзаф хийирлу я. Ам икI гьа­зурда: 1/4 чайдин тIуруна авай сенжефилдин регъвенвай дувулрал  са истикан ргазвай яд илична, 10 декьикьада тада. Ахпа адак са тIимил лимон ва вирт хуькуьрна, ишлемишда­.

—        Шекердин азар авайла ва дамарра ивидин гьерекат хкаж хьан­вайла, хуьрекдин кьве тIуруна авай жумун  пешерал, са истикан яд илична, 15 декьикьада цIал эцигна ргада. Ам йикъа пуд сеферда, фу нез 30 декьикьа амайла, хуьрекдин са тIуруна авайди ишлемишда.

—        Мадни дамарра ивидин гьерекат хкаж хьанвайла, келемдин пуд пеш, са кIунчI петрушка, 4-5 га­зар, цилерикай михьнавай ичинин са пад куьлуь авуна, миже хкудна, са се­ферда хъвада. Им йикъан кьадар я. Сагъа­рунин курс  — 10-12 югъ.

—        Бедендик иви тIимил хьанвайла, цIийиз гьазурнавай чугъундурдин, газаррин ва чIулав турпунин мижейрик (гьар сад са исти­канда авайди) са истикан вирт хуькуьрна­, хъсандиз тIур яна, хуьрек недалди вилик  хуьрекдин 1,5 тIуруна авайди ишлемишда.

“Айболит” газетдай.

Гьазурайди — Надият  Велиева