Эминан алемдай
“Лезги газетдин” 2021-йисан 39-нумрадилай башламишна кардик акатай “Эминан алемдай” рубрика акьалтI хьанвайдакай хабар гузва. И кардин себеб ам я хьи, и мукьвара Дагъустандин ктабрин чапханада Мансур Куьревиди (Низами Абдулгьамидова) туькIуьрнавай “Етим Эмин. ЦIувай куз тахьай цIарар” ктаб (656 чиникай ибарат ктабдин тираж 300 экземпляр я) чапдай акъатнава.
Ктабда гьатнавай хейлин шиирар ва абуруз талукь баянар газетдин чинриз акъатнай. КIелзавайбурун арадай хейлинбуру чпин фикирарни лагьанай.
ЦIийи ктабда гьатнавай гьар са шиирдиз гегьенш баянар ганва. Ктабдин эвел кьиле ганвай куьруь малуматда къейднавайвал, ана “Етим Эмина лезги чIалал кхьейбур я лагьана икьван чIавалди литературоведри туькIуьрай шииррин кIватIалрай ашкара тир ва араб гьарфаралди кхьенвай куьгьне чарарай гила гьат хъувунвай эсерар чапнава”.
Дагъустандин литературадин классик Етим Эминан ирс чун патал гзаф важиблу тирвиляй чапдай акъатнавай цIийи ктабдикай чпин фикирар лугьудай алимар, муаллимар, гафунин устадар ва кIелзавай маса ксар хьун тIебии кар я. Гаф кватай чкадал рикIел хкин, 2020-йисуз Москвада чапдай акъатай “Етим Эмин (1840-1880)” ктабдикайни кIелзавайбурун арадай газетрани журналра чпин фикирар лагьайбур тIимил хьанач.
К.Ферзалиев
