Алай йисан 15-октябрдиз Бакуда Р.Бегьбудован тlварунихъ галай Гьукуматдин Манидин Театрда СтIал Сулейманан 150-йисан юбилейдин мярекат гзаф гурлуз кьиле фена. Гуьлнара Къарахановадини Зекера Захарова тухвай няни 1957-йисуз Ж. Жаббарлыдин тIварунихъ галай Азербайжандин Киностудияда С.Сулейманакай чIугунвай «Мани икI туькIуьрзава» фильмдай са чIук къалуруналди гатIумна. «Самур» Лезги Милли Меркездин кьил Имран Рзаев и мярекат гьикI арадиз атанатIа рахана.
Азербайжандин Кхьирагрин КIватIалдин секретарь Чингиз Абдуллаева С. Сулейманан тIвар Дагъустандиз хьиз, Азербайжандизни сейли тирди лагьана. Мярекатдин режиссер Седакъет Керимовади вичин рахунар чIехи шаирдин уьмуьрдин рекьизни яратмишунриз талукьарна. Азербайжанда авай Дагъустандин векилханадин советник Людмила Къазиевади алай йисуз С. Сулейманан юбилейдин мярекатар Дагъустанда гьикI кьиле фенатIа малумат гана. ЧIехи камалэгьлидин яратмишунрин кьетIенвилерикай кхьираг-журналист Муьзеффер Меликмамедова чирвал гана.
Ахпа майдан шиирринни макьамрин ихтиярда вугана. Концертмейстер Заур Мусаев кьиле аваз «Сувар» ансамблди халкьдин макьамрикай зурба са программа туькIуьрнавай. Заура кфилдал, зуьрнедал, кларнетдал ягъай макьамралди и гъилерани вири гьейранарна. Эльвина Гьейдаровади, Жавагьир Абдуловади, Решад Ибрагьимова ва Роза Гьажимурадовади лагьай халкьдин манийри инсанрин рикIер хъуьтуьларна.
Мярекатдин виридалайни иер легьзеяр СтIал Сулейманан шиирар хуралай кIелун тир. Сегьнедиз экъечIайбуру лезги, урус ва азербайжан чIаларал шаирдин шиирар акьван фасагьатдиз лагьана хьи, вирибур гьейран хьана. Къурхмаз Гьезерова, Уруж Уружова, Асиф Салманова, Элмира Феремезовади, Офелия Пирвердиевади, Лейла Жавадовади, Ангелина Гьасановади инсанрин рикIера гел туна. Ингье мярекатдин рикIелай тефир, садбурун вилерал хвешивилин накъвар гъайи легьзеяр КцIар райондин Манкъулудхуьруьн мектебдин сад лагьай синифда кIелзавай Хадижа Султалиевади хуралай шиирар кIелай чIав хьана. Руша Сулейман бубадин «Ажеб хъсан тушни мектеб» шиир акьван фасагьатдиз кIелна хьи, залди адаз датIана гурлуз капар ягъана. РикI ацIанвай рушаз сегьнедай хъфиз кIанзавачир. Ада «заз мадни са шиир кIелиз кIанзава» лагьайла, залда авайбурун пIузаррик хъвер акатна. Хедижеди Седакъет Керимовадин «Чун лекьер я» шиир акьван хъсандиз, акьван цIай галаз лагьана хьи, зал капари юзурна. И руш сегьнедай ахъайиз кIанзавачир инсанриз.
Ихьтин рикIел аламукьдай легьзеяр накь гзафни-гзаф хьана. Театрдиз атанвайбур инай рикI ацIанваз, руьгь хкаж хьанваз хъфена.
Заз, и мярекат арадал гъайи касдиз хьиз, накь чахь галаз санал хьайи чи ватанэгьлийриз рикIин сидкьидай сагърай лугьуз кIанзава. Абуру чи халкьдиз хас тир чIехи меденият къалурна.
Азербайжандин Медениятдин Министерстводин векил Теране Къемберовади вичин гьейранвал къалурна лагьана:
— Ихьтин ацIай зал, ихьтин руьгь квай инсанар, икьван хъсандиз туькIуьрнавай мярекат гьайиф хьи, гьамиша гьалтдач. Зун гьейран хьана квел.
Мярекатдай хъфидайла чи ватанэгьлийри вирида сад хьиз чпин разивал къалурзавай. Садбуру «Икьван алакьунар авай жегьилар куьне гьинай жагъурнава?» лугьуз жузазвай. Авайвал лагьайтIа, абуру чунни гьейранарна. Баркалла квез, дидед чIалал рикI алай, ам хуьзвай, адан таъсиб чIугвазвай хайибур! Баркалла Сулейманан чIехи тIвар Азербайжанда генани кьакьанриз хкажай чи ватанэгьлияр!
Седакъет Керимова, «Самур» газетдин кьилин редактор
