Зул тIебиатдин гуьзел вахт я. Йисан кьиляй-кьилиз инсанри, пелекай гьекь кIвахьиз, багълара, салара, уьзуьмлухра чIугур зегьметрин нетижайрикай зулу хабар гузва — емишарни майваяр кIватIзава эхир.
Ведрояр, ящикрин хараяр тухузвайбур акурла, рикIик шадвал акатзава, гьатта жувазни абурухъ галаз физ кIан жезва. ЦипицIар кIватIна акьалтIарнаватIани, “молдова” сортунинбур алай чкаяр гьеле амазма. Усадьбайра, арендадин бязи участокра чIулав кулар булвилелди куьрс хьанвай чардахар акурла, рикIиз шад жезва. Ичерин 3 сорт, шир алай чуьхверарни кIватIнава. Алкьвадрин, Сийидрин хуьрера бязи усадьбайра Курхуьрелай тир Сийибулагьан, Баламирзедин, Мирзегьасанан ва масабурун участокрани хъсан бегьерар ава. Им, са шакни алачиз, абур чпин багъларихъ иесивилелди гелкъуьнин, гъавурда аваз анра вахтунда агротехникадин серенжемар кьабулунин, мал-къарадикайни хуьнин нетижа я. Багъ-бустан авай гьар са кас и тегьерда эгечIиз хьайитIа, шак алач, емишар бул жеда.
Райсудин Набиев
