10-июндиз Махачкъалада, Дагъустандин халкьдин шаир СтIал Сулейманан тIварунихъ галай бульварда, “СтIал Сулейманан бульвар” гафар кхьенвай мемориалдин кьул ачухуниз талукьарнавай мярекат кьиле фена. Ана “Лезги газетдин” кьилин редактор Мегьамед Ибрагьимова, лезгийрин Махачкъалада авай милли медениятдин тешкилатдин кьил Пакизат Рагьимхановади, “ННТ” телекъаналда лезги чIалал эфирдиз акъатзавай передача тухузвай Алихан Мегьамедрагьимова, “Яблоко” партиядин РД-да авай отделенидин председатель Альберт Эседова, РД-дин писателрин Союздин лезги секциядин руководитель Владик Батманова, журналистри, XX асирдин Гомеран шииратдал рикI алай инсанри иштиракна.
Пакизат Рагьимхановади къейд авурвал, СтIал Сулейманан экуь къамат эбеди авунин мураддалди гьеле 2009-йисуз гьа чIаван Махачкъаладин администрациядин кьил Саид Амирова къарар кьабулнай. “Къарардин пунктарикай сана къейднавай: “Бульвардин мулкарал “Бульвар Дагъустандин халкьдин шаир СтIал Сулейманан тIварунихъ янава” гафар кхьенвай мемориалдин кьул эцигин”. Ана гьакIни шаирдин гуьмбет алай чкани элкъвена жугъундалди кIевунин ва СтIал Сулейманан бульвар ачухуниз талукьарнавай мярекат кьиле тухунин тапшуругъарни гьатнавай. Вири и месэлаяр кьилиз акъудунал гуьзчивал тухун Махачкъаладин администрациядин кьилин заместитель О.И.Портнягинадин хиве тунвай.
Гьайиф хьи, икьван йисар алатнатIани, къарардин гьич са пунктни кьилиз акъуднач. Идалай гъейри, хейлин СМИ-ра, гьатта официальный документрани кваз, СтIал Сулейманан бульвар кхьидай чкадал, гъалатI яз, Родопский бульвар кхьизвай. Эхирни и кар чна гъиле кьуна. Чи алахъунри, кIвалахри бегьерни гана”, — алава хъувуна П.Рагьимхановади.
Ада мемориалдин кьул ачухунин карда вичиз куьмекар гайи Альберт Эседоваз, ашукь Алиханаз, “Союз молодежи Южного Дагестана” ДРОО-дин руководитель Равидин Абдурагьимоваз, Владик Батмановаз ва са жерге маса юлдашриз сагърай лагьана.
Къейд ийин хьи, мемориалдин кьул гьазуруниз акъатай харжийрин чIехи пай П.Рагьимхановади вичин хивез къачуна. Гележегда адахъ бульвардиз гьахьзавай чкадал еке тагъ эцигдай фикирни ава. И кардани вичиз куьмекар гудай ватанпересар жедайдахъ П.Рагьимхановади умудар кутазва.
Агьмед Магьмудов
