Суварин вилик квай йикъар чIимелбур, серинбур тир. 12-июндизни меркезда цав булутри кьунвай. Экуьнахъ марфадин стIаларни аватна, амма югъ яваш-яваш ачух хьана. Ида суварик иштиракиз ашкъи авайбурун гуьгьуьларни хкажна.
Сятдин цIуд жедалди Махачкъаладин кьилин майдандал РД-дин Халкьдин Собранидин депутатар, шегьердин са бязи идарайрин, карханайрин руководителар, общественный организацийрин векилар, тIвар-ван авай спортсменар, волонтерар, студентар, ученикар кIватI хьанвай. Абуру майдандал тешкилнавай “Россиядин халкьарин хоровод”, “Россиядин халкьарин дуствилин парад”, “Зун россиянин я” акцийра иштиракна. Жегьилри майдандал 450 квадратный метр алай Россиядин Федерациядин пайдах цава кьуна ва ам суварин кьилин мярекат кьиле физвай Урусрин госдрамтеатрдин вилик кьван тухвана.
Инал меркездин искусстводин устадри, жегьил гьевескарри, кьуьлердайбурун дестейри еке концерт гана. Мярекатда РД-дин Гьукуматдин Председателдин Сад лагьай заместитель Анатолий Къарибова, РД-дин Гьукуматдин Председателдин заместителдин везифаяр вахтуналди тамамарзавай Рамазан Жафарова, РД-дин Халкьдин Собранидин депутари, шегьердин администрациядин къуллугъчийри, мугьманри иштиракна.
Суварин мярекат ачухунихъ, Россиядин югъ тебрик авунихъ галаз сад хьиз, Махачкъаладин администрациядин кьилин везифаяр вахтуналди тамамарзавай Абусупьян Гьасанова кIватI хьанвайбурухъ элкъвена лагьана:
— Гьар йисуз чна къейдзавай вири халкьарин и сувари чун сад, ислягьвилин терефдарар тирди, Россиядин государственный лап хъсан адетар давамарзавайди, уьлкведа яшамиш жезвай цIудралди халкьарин культурадиз, тарихдиз, милливилиз гьуьрметзавайди къалурзава.
Россиядин суварин йикъахъ Дагъустан патал мадни кьетIен метлеб ава. ГьикI лагьайтIа, чи республикада асирралди дуствилелди, меслятдивди, къуншивилелди цIудралди миллетрин векилар яшамиш жезва. Дагъларин уьлкведа лап фадлай адетдиз элкъвенвай сада-садаз куьмек авунин, хванахвавилин, гьуьрмет авунин ва акьалтзавай несилрив агакьарзавай ерияр чи милли ивирар, ирс я.
Дагъустандин эстрададин гъетери, аялрин филармониядин манидарри, шегьердин искусствойрин школайра кIелзавайбуру ватанпересвиликай, дуствиликай, хайи макандикай манияр лагьана, хореографиядин коллективри чи халкьарин кьуьлерна.
Суварин сергьятра аваз мадни мярекатар кьиле фена. «Дуствилин кIвале» республикадин шегьеррин ва районрин школайра лап хъсандиз кIелзавай ва жуьреба-жуьре конкурсра, олимпиадайра гъалибвал къачур школьникар кIватIнавай ва абурув РД-дин Гьукуматдин Председателдин заместитель, образованидинни илимдин министр Уммупазиль Омаровади Россиядин Федерациядин гражданин я лагьай паспортар вахкана.
“Дуствилин кIвалин” вилик квай майдандал республикадин шегьеррайни районрай халкьдин фольклордин коллективарни атанвай. Абуру чи халкьарин милли кьуьлер авуна, манияр лагьана. Мярекатрин иштиракчийриз ва меркездин мугьманриз ина ачухнавай ктабрин ва шикилрин выставкайриз килигдай мумкинвални хьана. Абуруни чи халкьарин садвиликай, миллетрин, чIаларин жуьреба-жуьревиликай ва чи уьлкведин зурбавиликай лугьузвай.
Россиядин йикъаз талукь мярекатар чи районра, шегьеррани тешкиллудаказ кьиле фена.
Нариман Ибрагьимов
