Ахцегь райондин администрацияда гатфаринни гатун девирда живер цIуруникди ва дагълара марфар къуникди вацI алахьунихъ галаз алакъалу яз, кьетIен гьаларин комиссиядин (КЧС) заседание кьиле тухвана. Лагьана кIанда, райондин кьил Осман Абдулкеримова арадал атанвай гьалар хсуси гуьзчивилик кутуна ва ада вири къуллугъриз районда авай залан техника кIвалахрал желб авун, тIебиатди ганвай зиянар жезмай кьван тIимиларун патал герек тир тапшуругъар ганва. Арадал атанвай гьалар фикирда кьуналди, 6-июндилай Ахцегь районда Самур вацIун цин дережа хкаж хьунихъ галаз алакъалу яз кьетIен гьаларин режим кардик кутунва. Мумкин тир хаталувилин вилик пад кьун патал магистральный газопровод вахтуналди хкуднава ва инсанрин хатасузвал таъминарунин маса серенжемар кьабулна.
КьетIен гьаларин комиссиядин заседанидал рахай райадминистрациядин кьилин заместитель, райондин КЧС-дин председатель Роберт Гьамзаева кIватI хьанвайбур “Калун кьер” участокда арадал атанвай четин гьаларихъ галаз танишарна.
— Гатфаринни гатун девирда ва акъваз тийиз марфар къуникди вацI кьадарсуз хкаж хьанва. Яд авахьунин йигинвал ва цин дережани хаталудаказ артух хьанва. Кавказдин чIехи вацIарикай сад тир Самурди Ахцегьрин сергьятра вич авахьзавай тереф садлагьана дегишаруникди ам 200-далай артух инсанар яшамиш жезвай яшайишдин кIвалерив ва хуьруьн майишатдин хсуси чилерив агатнава. Идалайни гъейри, вацIун къерехар тухуникди вацI магистральный газопроводдиз лап мукьва хьанва, — лагьана ада.
Заседанидал гьакI муниципалитетдин ГО-дин ЧС-дин ва ЕДДС-дин Управленидин начальник Сердер Моллалиевни рахана. Ада къейд авурвал, гьалар гьакъикъатдани къалабулух кутадайбур я. И месэла гьялун патал райондихъ бес кьадар такьатар авач. Ада Дагъустан Республикадин руководстводин патай куьмек агакьдайдак умуд кутуна.
Райондин депутатрин Собранидин председатель Абдулкерим Палчаева кIватI хьанвайбур кьетIен гьалар арадал атунин къурхулувал тIимиларун ва сифте нубатдин серенжемар кьиле тухун патал залан техника ишлемишунин рекьяй кьабулзавай сифтегьан серенжемрихъ галаз танишарна.
Совещанидал ДЭП-4 карханадин начальник Мегьамед Юсуфовни рахана. Ада вичин ихтиярда авай “Т-170” маркадин трактор вацIукай хуьдай серенжемар кьиле тухузвайбурув вугунин гаф гана.
Эхирдай комиссияди Дагъустан Республикадин Гьукуматдиз, Россиядин МЧС-дин РД-да авай ГУ-диз Ахцегьа тIебиатдин бедбахтвилер алудун патал малумат гьазурна рекье тунин къарар кьабулна.
* * *
9-июндиз Дагъустандин премьер-министр Артем Здунован регьбервилик кваз совещание кьиле фена. Анал Самур вацI алахьунихъ галаз алакъалу яз Ахцегь районда арадал атанвай гьалар веревирдна.
И мярекатда РД-дин Гьукуматдин Председателдин заместителдин везифаяр вахтуналди тамамарзавай Рамазан Жафарова, РД-дин тIебиатдин ресурсрин ва экологиядин министрдин везифаяр вахтуналди тамамарзавай Набиюлагь Къарачаева, Ахцегь райондин кьил Осман Абдулкеримова, са жерге министерствойрин ва ведомствойрин векилри иштиракна.
Совещание ачухай РД-дин Гьукуматдин Председателди , кьилди къачуртIа, лагьана: “Чи вацIара цин дережа хкаж хьунихъ галаз алакъалу сифтегьан хабарар агакьна. Тайин тир къурхулувилер арадал атанва. РД-дин экологиядин министерстводин ва маса къурулушрин чалишмишвилерин нетижада а къурхулувилерин са кьадар пай гъиле-гъилди алудиз алакьна. Къейд авун лазим я хьи, алай вахтунда ихтилат Самур вацIа цин дережа хкаж хьуникай ва вацIуз мукьва тир дараматар патал къурхуллувал арадал атуникай физва. Неинки агьалияр, гьакI са жерге къурулушар, кьилди къачуртIа, магистральный газопровод патал къурхуллувал арадал атанва. Ида, агакьарнавай делилрал асаслу яз, саки 16 агъзур кас агьалияр газдалди таъминарун вахтуналди акъвазарунал гъун мумкин я. Кардив гьелелиг и саягъда эгечIзава: месэла арадал атанватIа, ам гьялун герек я. Гьа са вахтунда чна аннамишун лазим я хьи, гележегдани ихьтин гьалар арадал татун патал лазим тир вири чараяр акун герек я.
ВацI алахьуникди арадал атай гьаларикай ва къурхулувал алудун патал кьабулнавай серенжемрикай малумат муниципалитетдин кьил Осман Абдулкеримова гана.
Адан рахунриз баян гуналди, Артем Здунова и месэладив лап мукьуфдивди эгечIун чарасуз тирди къейдна, гьикI хьи, ихьтин гьалар мад арадал атун мумкин я. Ахпа совещанидин иштиракчийри ихьтин къурхулувилер алудун патал кьабулун лазим тир серенжемар веревирдна.
Гележегда цин дережа хкаж хьуникди Самур вацIу къурхуллувал арадал гъин тийидайвал кьер мягькемардай серенжемар кьабулун патал герек тир пулдин такьатар чара авун патал махсус чар гьазурун ва ам ятарин ресурсрин Федеральный агентстводиз рекье тун тапшурмишна.
Дашдемир Шерифалиев
