Мукьвара Избербашдин физкультурадинни сагъламвал мягькемардай комплексда кикбоксингдай СКФО-дин чемпионат ва кIвенкIвечивал патал акъажунар кьиле фена. Ана Дагъустан, Чечня, Ингушетия, Кеферпатан Осетия-Алания республикайрай ва Ставрополдин крайдай тир 300-далай виниз спортсменри иштиракна. СтIал Сулейманан райондин патай ана Эминхуьряй тир стхаяр Исмаил ва Агьмед Имамоври векилвална. РикIел хкин: абуру са тIимил вахт идалай вилик Каспийск шегьерда Дагъустандин кIвенкIвечивал патал кьиле фейи акъажунра 1-чкаяр кьунай.
Федеральный округдин чемпионатда Исмаил Имамова 63 килограммдин заланвал авайбурун арада 1-чка кьуна. Адан гъвечIи стха Агьмед 69 килограммдин заланвал авайбурун арада 2-чкадиз лайихлу хьана.
Гила Исмаила алай вацра Волгоград шегьерда Россиядин кIвенкIвечивал патал кьиле фидай акъажунра иштиракда.
Стхайри Белижда тренер Шагьмурад Залован гъилик вердишвилер къачуз пуд йис хьанва. Абур республикадин ва Вирироссиядин хейлин турниррин гъалибчияр ва призерар я.
Исмаил ва Агьмед Имамовриз спонсорвилин куьмек Каспийскдин дуьм-дуьз механикадин заводдин директор Шарафудин Фатуллаева гузва.
Хазран Кьасумов
