«Хуьруьн чкайра авай умуми образованидин тешкилатра физический культурадал ва спортдал машгъул хьунин шартIар арадал гъун» проект ва «Образование вилик тухун» гьукуматдин программа кьилиз акъудунин сергьятра аваз, Сулейман-Стальский районда цIийи кIелунин йисан вилик 10 мектебда воркаут-майданар ишлемишиз вахкана. Идан гьакъиндай «Лезги газетдиз» муниципалитетдин администрациядин пресс-къуллугъди хабар гана.

Кьилди къачуртIа, спортдал машгъул жедай майданар алай йисуз ДаркIуш-Къазмайрин, Эминхуьруьн, Агъа СтIалрин, Испикрин, Алкьвадрин, Сийидхуьруьн, НуьцIуьгърин, Курхуьруьн, Уллугъетягърин, Шихидхуьруьн мектебрин гьаятрин мулкара, лазим тадаракралди таъминаруналди, арадал гъана.

Алатай йисара райондин 12 мектебдин мулкара воркаут-майданар туькIуьрнай. Малумарзавайвал, и жуьредин майданар тешкилунин кIвалахар гележегдани давам жеда.

Идалайни гъейри, «Образование вилик тухун» госпрограмма кьилиз акъудунин сергьятра аваз алай йисуз Агъа СтIалрин СОШ-дин спортзални тамамвилелди ремонтдайвал я.

Воркаут-майданар физкультурадин тарсарани, жуьреба-жуьре спортдин мярекатризни акъажунриз гьазурвилер акунин серенжемрани ишлемишзава.

«Лезги газет»