Муаллимрин августдин конференция

26-августдиз Ахцегь РДК-дин залда райондин муаллимрин конференция кьиле фена. Ам, муаллимриз кIелунин цIийи йис тебрикуналди, райондин образованидин Управленидин (РУО) заведующий  Ал­мас Гьажиева  ачухна ва кьи­­лени­ тухвана. Конференциядин кIва­­­лах­да  “Ахцегь район” МР-дин кьил Осман Абдулкеримова, депутатрин  райсобранидин председатель Абдул-Керим Палчаева, райадминистрациядин кьилин заместитель Алмас Шуаева, райондин Общественный палатадин председатель Али Исмаилова, Ахцегь ва До­къуз­пара районрин саналди тир ОВД-дин начальник, полициядин подполковник Руслан Хаспулатова,  райондин образованидин къуллугъчийрин профкомдин председатель Хийируллагь Алиева,  муаллимвилин зегьметдин ветеран Патрудин Азизагъаева ва масабуру иш­тиракна.

“Алай девирдин образование: цIийи истемишунар, мумкинвилер, жавабдарвилер” — темадай доклад РУО-дин начальник Алмас Гьажиева авуна. Кьилди къачуртIа, ам эхиримжи йисуз райондин образованидин къурулушда жезвай дегишвилерал акъвазна, залда авайбурун фи­кир ЕГЭ-дин ва ОГЭ-дин нети­жай­рал желбна ва кIелунин цIийи йи­суз вилик квай месэлайрикай рахана.

Доклад алава хъувун яз, тайин темайрай трибунадихъ  Хуьруьгрин  школада сифтегьан классрин муаллим Салам Гьажилаев, Ахцегьрин 2-нумрадин СОШ-дин муаллим  Минара Къухмазова, Луткунрин СОШ-дин муаллим Амина Абаскъуьлиева, “Жегьил космонавт” аялрин бахчадин къуллугъчи Индира Мурсалова, райондин образованидин къуллугъчийрин профкомдин председатель Хийируллагь Алиев, РОВД-да яш тамам тахьанвай аялрихъ галаз кIвалах­завай инспектор (ПДН) Рафик Кичибегов ва маса юлдашар экъечIна.

— Чи къенин йикъан яшайиш, культурадинни илимдин дережа ва хушбахт гележег — вири школадилай, яни ана муаллимрин гьакъисагъ зегьметдилай аслу я, — башла­мишна вичин рахунар муаллимриз кIелунин цIийи 2019-2020-йис рикIин сидкьидай мубарак авурдалай кьулухъ Ахцегь райондин кьил Осман Абдулкеримова.  — Гьавиляй образованидин идарайра материалринни чирвилерин такьатрин база мягькемаруниз чна кьетIен фикир гузва. Шаз республикадин “100 школа” проектдай — 3, цIи “150 школа” проектдай чIехи 5 школадин дараматар капитальнидаказ ремонтнава, чкадин бюджетдин гьисабдай мад са шумуд школа, “Рассвет” аялрин бахча туькIуьр хъувунва; цIи Луткунрин хуьруьн школадин (къимет: федеральный бюджетдин 412 млн. манат) эцигунар бегьемарда. Школайра чими туалетар, медицинадин къулай кабинетар кардик кутада.

Фикирдик мукьвал вахтунда райцентрада чIехи спорткомплекс, 120 аялдин чка авай цIийи школа, 60 аялдин чка авай бахча эцигун ква. Гьелбетда, ибур вири чи гележег тир аялар фикирда аваз ийизвай  крар я.

Гьа са вахтунда чахъ гьялиз та­хьанвай месэлаярни пара ава, абур гьялунал машгъул я. Амма 11 йисуз­ школадиз къвез-хъфизвай 28 аял цIи (шаз районда ахьтинбур 16 авай) аттестат авачиз аму­кьун — им лап беябурчивилин гьал я. Сен­тя­бр­дилай башламишна, эвелимжи нубатда, гьа и татугайвилел эхир эцигун за жуван гуьзчивилик кутада: имтигьанрин комиссияр дегишарда, зайиф гьар са аял муаллимрин кIвачихъ гал­кIурда, гьевесламишдай пулар, сифте нубатда, гьабурухъ галаз кIва­лахзавай муаллимриз къведайвал ийида, школайра 10 баллдин къайда твада.

Эхирдай райондин школайрин хъсан кIвалахзавай са жерге муаллимриз Ахцегь муниципалитетдин кьилин патай гьуьрметдин гра­мота­яр гана, гьакIни райондин образова­нидин къурулуш вилик тухунин гьа­къиндай махсус къарар кьабулна­.

Дашдемир Шерифалиев