Сентябрдиз Каспийскда, А.Алиеван тIварунихъ галай спортдин дворецда, государстводин машгьур деятель М.-С.Умаханован экуь къаматдиз бахшна, боксдай кьиле тухудай «А» классдин международный турнирда дуьньядин са шумуд уьлкведай (Венесуэладай, Швециядай, Къиргъизистандай, Узбекистандай ва масанрай) боксёрри чпин устадвал къалурда.
Дагъустандин физический культурадин ва спортдин министерстводин малуматда хабар гузвайвал, турнирдиз дуьньядин 15-далай виниз уьлквейрай спортсменар атун вилив хуьзва.
РикIел хкин: коронавирусдин тIугъвал ва международный санкцияр себеб яз, «Умаханован турнир» 2020-йисалай инихъ тухуз хьанвач.
***
22-июлдиз Махачкъалада, РД-дин образованидин ва илимдин министерстводин РДЮСШ-дин футболдин майдандал (И.Шамилан проспект, 70 «б»), Дагъустандин халкьдин шаир Расул Гьамзатован 100 йисан юбилейдиз бахшна, республикадин муниципалитетрин командайрин арада футболдай «Дуствилин Кубок» патал акъажунар кьиле тухуда. Абур пакаман сятдин 9-даз башламишда. Кубок ачухуниз талукьарнавай шад мярекат — сятдин 10-даз.
Кубокдин тешкилатчияр Махачкъаладин администрация, Дагъустандин физический культурадин ва спортдин министерство, РД-дин футболдин союз, РД-дин образованидин ва илимдин министерство, РДЮСШ, РД-дин футболдин федерация я.
«Лезги газет»
